🍽老趙廚房 (葵芳)
📍葵芳葵義路2-10號新葵芳花園好爵中心商場1樓
-----
星期6去葵涌附近行街，夜晚本來想去葵涌廣場掃街，但係見到冇得坐，又好多人驚除口罩危險，所以就決定行到去對面嘅好爵中心食雞煲🐥。
呢間餐廳店面面積頗大，可以容納好多張檯，除咗雞煲之外，仲有酸菜魚、豬骨煲、牛腩煲、胡椒豬肚煲同普通打邊爐嘅芫荽冬瓜煲等等，七點之後入坐，雞煲可以無限添加，好抵食，而其他湯底就係一次性嘅，冇得免費添加。食完鍋底之後，就可以開始任食各種火鍋料打邊爐，另外仲有免費前菜、炸物、飲品、雪條同冰水果等🥢。
雞煲可以自行選擇辣度，個人建議起碼食中辣🌶以上，花椒香味先會夠突出。「💡另外👶🏻B仔仲有個私人美味技巧小分享，就係可以於醬料區自己攞一大碟芫荽，另外再喺飲品櫃攞一罐Stout嘅黑啤，再將兩樣嘢一齊倒入雞煲，會令成個雞煲嘅惹味同嫩滑程度都大大提升。」
而火鍋料方面，質素大致中規中矩「不過🐷穀飼黑豚肉就幾surprise，有媲美牛涮鍋or牛陣嗰啲日式火鍋店嘅質素」，款式亦唔多唔少，當中某啲頗有特色，例如有手工餃子、台式小湯包、仲有我最encore好幾次嘅芝麻麻糬燒，軟軟糯糯又鹹鹹甜甜，好得意。
食完火鍋之後，臨尾就可以食個🍉冰西瓜同埋韓國奇異果🥝菠蘿冰🍍解解辣，做個完美收結。
整體黎講，呢一間店舖嘅雞煲雖然不至於係我食過嘅雞煲裏面最出色，但性價比算係幾驚艷，地點近地鐵站、座位寬闊好坐、有電視睇、阿姐服務態度唔錯、任食任飲款式唔少人均都$200有找，係可以回頭返㗳嘅餐廳👍🏻。
-----
👶🏻B仔整體評價：7.8/10個👍🏻
👶🏻B仔抵食程度：8.5/10個👍🏻
👶🏻B仔環境評分：7/10個👍🏻
👶🏻B仔味道評分：7.5/10個👍🏻
👶🏻B仔回頭機會：8/10個👍🏻
-----
#swallowhongkong
跟住我一齊吞食香港啦！🤤
#swallowkwaifong
@ 老趙廚房
