走得就走番英國要知幾多？ (5) 點做Tier 1企業家？
我之前有提及過，包括係居英權第二代嘅家人（本身已經係British Citizen嘅家庭團聚），要移民英國嘅基本要求都係要申請Residence Visa住5年。香港人近期最熱門申請嘅英國Residence Visa，我相信係Tier 1 Entrepreneur（Tier 1 企業家簽證）。所以，我希望今次可以講解一下Tier 1 Ent.嘅概念同需要留意嘅地方。
好多人會誤會Tier 1 Ent.係投資移民英國，其實真正嘅投資移民係另外一種簽證，叫做Tier 1 Investor Visa。Tier 1 Investor Visa係要求至少投資200萬英鎊到英國註冊嘅股票或債券等等投資工具（金額越大，攞到永久居留時間越短），但係一定唔包括任何與物業資產有關。所以Tier 1 Investor Visa嘅資金成本係比Tier 1 Ent.高十倍，而且性質亦完全唔同。
而Tier 1 Ent.嘅概念係申請人係需要用20萬英鎊响英國建立或者投資而同時營運一個業務，如果有關嘅業務連續運作到五年，申請人同佢嘅家屬就可以用5 Year Route申請永久居留（Indefinite Leave to Remain）。而同其它擁有ILR嘅人士一樣，攞到ILR之後再响英國住一年，如果合乎其他要求，就可以申請入籍。
現時T1 Ent.嘅基本申請資格係使用計分制度嘅(Point Based System)，要求嘅分數係95分，即係如果需要申請，最低嘅要求係要達到95分。要有95分，申請人就要證明五樣嘢：第一，擁有至少20萬英鎊唔小過三個月（25分）；第二，證明資金已存入英國正規金融機構（25分）；第三，證明申請人擁有全權使用有關嘅資金（25分）；第四，英語水平，B1 Level（即係等於IELTS 4-4.5分）（10分）；最後，申請人及家屬嘅90天生活費（每人3,310英鎊），而厘個生活費係唔包括响嗰20萬英鎊裡面嘅（10分）。
T1 Ent.係可以有兩個申請人Team up嘅，所以如果係Team Up Application，每個申請人要證明嘅資金要求就係一半，而上面關於金錢上嘅分數係可以共同使用嘅。因為兩個申請人都會做同一個業務，所以佢地同時都要配合到Business Plan內嘅Background同工作職能。
要留意嘅係，因為洗黑錢問題，依家Home Office依家會要求多小小資金嘅來源證明，而且亦要證明有關嘅錢係已經完稅。
當申請人達到95分要求之後（關於其他Residence Visa嘅基本要求例如無犯罪記錄同照肺嗰啲唔講），跟著Tier 1 Ent.嘅最核心又最為重要嘅就係Business Plan。
因為Tier 1 Ent.嘅原意就係希望申請人去英國係建立或者投資同營運一個生意，所以Business Plan對於Tier Ent.嘅申請人可以話係極之重要。Home Office對於Tier 1 Ent.申請人嘅Business Plan係有一套好詳細嘅基准測試，叫 'genuine entrepreneur' test。
當中Home Office會考慮好多因素，包括申請人嘅學歷、工作經驗、有關嘅生意嘅可行性、個Business Plan嘅可信性等等。咁即係無論建立新嘅生意或許投資一個現存嘅業務，Home Office最基本嘅要求都係會用'genuine entrepreneur' test。
有唔小有興趣申請Tier 1 Ent.嘅朋友，都可能接觸過好多唔同形式嘅現成方案。我唔會响厘度評論可行性（因為我唔係專家、都唔係達人，亦唔係僱問！），我只係希望大家諗一諗，有無可能有現成嘅方案係可以係人都適合，而同時Home Office係會唔知嘅呢？同時，我亦希望大家要緊記，錢响自己控制之內係永遠都係最穩健嘅？而且，業務係需要持續五年，除咗自己本人之外，問下自己究竟邊個可以保證個業務可以做到？
同時，近期Home Office亦好喜歡邀請每一個申請人進行interview，而個interview嘅目的簡單啲講就係要知道申請人了唔了解自己嘅業務同如何運作。厘個interview亦都係唔小申請人出問題嘅地方，即係申請人如果响interview嘅時候，表現出對Business Plan嘅內容同運作唔夠熟悉的話，Home Office亦都有權reject個申請。
如果申請成功，Home Office就會發出40個月嘅簽證。而申請人就要到達英國之後六個月內進行Business Plan內嘅生意。簽證到期之後，申請人就證明個生意仍然運作中，同時亦要提交會計資料。其實，對於賺錢與否，Home Office未必會太在意，反而在意嘅係申請人有無營運同會唔會繼續營運。不過，要留意嘅係，Home Office到續証嘅時候亦都有權再用'genuine entrepreneur' test，即係有機會再有interview。
另外一個Tier 1嘅要求就係制造就業，即係需要聘請兩名合法居英嘅人士。厘個要求就對於續領簽證嘅時候比較重要，基本要求係續期之前十二個月。
無點點都好，我想大家當想去做Tier 1嘅每一個決定之前，麻煩去細心諗一諗'genuine entrepreneur' test厘個term，中文嘅意思大概係「真正企業家測試」。測試嘅用意，我相信唔需要我講，大家都會明白。唔明白的話，可以問多啲或者大家討論下。
因為Tier 1 Ent.實在包含太多細節，我唔想太長篇大論，所以只係講大概嘅概念。
又要講嗰句不負責任嘅說話，我上面嗰啲只係基本資料，唔係乜嘢秘密，網上都可以搵到。我做嘅只係綜合晒啲資料比大家參考。每個人嘅情況同背景都唔同，我亦只係分享下，並唔係什麼專業意見。當然，如果有任何錯漏，我非常歡迎大家留言指正。如果有問題嘅，同時亦歡迎inbox或者留言comment，大家討論下。
#移民英國 #走得就走 #番英國 #點做英國公民 #居英權第二代 #T1Entrepreneur #英國企業家簽證 #Tier2WorkingVisa #英國工作簽證 #英國家庭團聚 #英國SettlementVisa
*****************************
走得就走番英國要知幾多？ (1) BN(O)係乜
goo.gl/83jUjM
走得就走番英國要知幾多？ (2) 點樣先可以做英國公民？
https://goo.gl/PAhd9g
走得就走番英國要知幾多？ (3) 英國有無太空人？
https://goo.gl/eYtsTM
走得就走番英國要知幾多？ (4) 乜係British Citizen by Descent
http://bit.ly/2vlevp1
*****************************
英國工作簽證 入籍 在 就可以申請入籍成為公民。 咁要攞到永久居留 - Facebook 的推薦與評價
响現有嘅政策之下，要响英國入籍成為英國公民，最基本要攞到嘅係永久居留 ... Visa（企業家簽證）或者Tier 2 Working Visa（工作簽證）。 ... <看更多>