《逆流大叔》中的香港人精神（含少量劇透）
—
睇《逆流大叔》！睇《逆流大叔》！睇《逆流大叔》！重要嘅嘢要連續講三次（好似係），如果有人問你今個暑假淨係有錢睇一套戲，唔准諗即刻答，向佢推薦《逆流大叔》，因為佢唔單止係套好戲，仲係一套將香港人精神發揮得淋漓盡致嘅好作品。
—
「度縮」、「算爆」、「老乜土」，電影開首嘅兩場戲，已經將香港人嘅特性表露無遺：話說故事入面嘅天馬寬頻要裁員，一眾員工決定搞大罷工，點知喺聯合行動之下就有潘燦良、胡子彤同埋吳鎮宇呢三隻牛鬼蛇神，睇風向做人，見人少唔夠砌就簽假名，但仲要大大聲話自己撐罷工，呃埋天真嘅岑珈其。而黃德斌嘅角色，就係欺壓低級員工嘅中層，助紂為虐。喺呢一刻，四位主角仍然係一個「順流大叔」。
—
面對住爾虞我詐嘅商業社會，簡單嘅兩幕戲無令我哋對幾位主角有討厭嘅感覺，反而令人產生咗一啲荒謬嘅共鳴感（至少係我啦～），因為佢哋係衰衰格格，但至少都只係為咗保住自己個飯碗，好多嘢作為香港人我諗就算你未做過，至少喺心入面都諗過。
—
《逆流大叔》將每個角色嘅故事繼續挖深，然後你會發現衰格嘅人之所以會衰格，人之所以會選擇委曲求存，原來係因為更龐大嘅社會壓迫，原來每個生活喺香港嘅人，都有一啲隱忍不言嘅傷痛，有一啲共同嘅傷痕。
—
「男人唔係錢銀，就係女人。」四位主角，各自都有自己嘅問題：吳鎮宇想溝胡定欣，但買大送細，煩緊點樣籌錢比個女去外國讀書；潘燦良面對嚴重嘅婆媳關係，家無寧日；胡子彤為咗同女朋友嘅將來，放棄做運動員；而較為有錢嘅黃德斌，就被迫同老婆莊思敏離婚。
—
乜嘢係好嘅編劇，就係以小見大，見微而知著。幾個主角嘅問題各異，但如果你細心留意，原來所有嘢都可以扣連香港現時嘅問題。例如由最簡單吳鎮宇嘅「錢」，中年人缺乏向上流動性，香港人被迫幫有錢佬打工嘅問題，去到香港嘅房屋問題，「相見好同住難」，狹窄居住空間之下嘅婆媳糾紛，再講到社會點樣摧毀年青人嘅夢想，發揮所長苦無出路，最後去到講黃德斌，比你做到管理層又點樣？日做夜做，最後做到老婆又走佬。
—
香港人被社會問題重重圍困，苦無出路，除咗李嘉誠同富二代之外，會有人無共鳴咩？當中更悲嘅一個描寫係，令幾位主角搵番自己人生節奏嘅龍舟比賽，其實一開始都係比公司迫你參加，只係為直播搵錢攞彩嘅" EXTRA DUTIES"。員工只係呼之則來，揮之則去嘅安全套，香港人從來都無可以當家作主嘅機會。
—
但係，陳詠燊編劇兼導演無選擇悲到盡頭，有一幕戲講吳鎮宇同胡定欣去睇樓，死慳死抵終於租到一個「海景單位」，即使個「海景」只係樓與樓之間嘅一條空隙。香港人就係有喺狹縫入面種玫瑰嘅能力，即使環境幾艱難都好，我哋就係唔認命，就係唔服輸，就係識變通，呢個就係香港人嘅生命力。
—
由「天馬龍」變成「英雄本色」，《英雄本色》即係咩意思呢？意思就係突破身份政治，黑社會狄龍原來係有情有義嘅好哥哥，MARK哥雖然粗口爛舌，但為朋友可以兩脇插刀，你喺啲咩唔係因為你嘅身份係啲咩，而係你做過啲咩令你成為啲咩。
—
呢樣嘢正如你大大聲話自己係香港人，但你從來都唔會支持香港優秀嘅本土文化，令香港之所以會係香港嘅東西，而甘心情願被其他文化侵蝕，咁你仲配話自己係香港人咩？就好似最尾「英雄本色」龍舟隊衝咗線之後仲唔停，一齊大叫「九點半，大會堂！」，「九點半，大會堂！」好多嘢外人唔明，得我哋香港人先明，係因為共同語言，係因為同情共感，你又明唔明？
—
相害定係相愛，順流定逆流，所謂同舟共濟，唔係好景果陣先識攝位一齊影相，而係喺艱難嘅時候一齊打落門牙帶血吞。贏定輸，仲緊要咩？無悔咁笑到最後，就係最大嘅勝利。
—
寫文兩年幾，呢篇應該係我寫嘅過程當中最激動嘅一篇，打打打打半個鐘就打好。我唔知篇嘢最後有幾多人睇到，可能得一千人，五百人，但決定權永遠都唔喺我手上，係靠大家嘅口耳相傳，團結就是力量，最後送比大家我一直以嚟堅信嘅八隻字：「香港電影，香港人撐。」
—
畫作CREDIT：塵阿力映畫
（呢度將會開展一個小型嘅合作計劃，不定期同本地畫家阿力合作。我寫文，阿力畫畫咁，希望大家可以多多支持佢嘅專頁，而更重要嘅係，佢畫好多香港電影，畫好多香港明星，畫得好靚！！）
—
逆流大叔 Men on the Dragon
天下一電影 One Cool Film
吳鎮宇 Francis Ng Chun Yu
POON Chan-leung 潘燦良
Tsz Tung Tony Wu 胡子彤
黃德斌
胡定欣 Nancy Wu
莊思敏jacquelin
余香凝 Jennifer Yu
KaKi Sham 岑珈其
柳俊江 Lauyeah
陳詠燊 Sunnyhahaha
莊思敏離婚 在 「拿督千金」莊思敏離婚早有預兆！貧民丈夫以為攀上豪門 的推薦與評價
「拿督千金」莊思敏離婚早有預兆！貧民丈夫以為攀上豪門，不料婚後預謀落空原形畢露！没想到为他隐退却落得如此下场富家千金放棄財產下嫁許效舜， ... ... <看更多>