【誠實食後感】3款淘寶麵
#自購 #淘寶 #螺螄粉 #褲帶麵 #Biángbiáng麵 #傳說只是傳說
我都話我好鬼out，而家先嚟試螺螄粉。
又因為螺螄粉大家應該都睇到悶，所以我又另外淘咗包陝西Biángbiáng麵嚟試。
#螺霸王鴨腳螺螄粉（¥15.80）
呢包係三包入面開嘅第一包，為咗試原味所以我全部配料同辣油都落晒。
傳說中佢個湯同某啲配料好臭，但煮緊果陣逐包拎嚟索其實都唔覺得臭（可能係品牌問題？），
落埋包辣油就更加聞唔到本身果陣味。
啲料同湯聞落唔臭，但唔算係好吸引嘅香味，
例如啲酸筍咁啦，咪又係大陸酸筍味，
個螺螄肉湯料包聞落就係海鮮味嘅味精湯味囉。喺臭味呢方面係失望嘅。
其實係唔係因為有醋溝埋果種酸味令人覺得臭？我覺得唔臭喎😂
個米粉唔錯，粗幼同口感有啲似米線，但彈牙過米線，又滑！
腐皮叫做正正常常，有兩條叫「大豆絲蛋白條」嘅物體，食落似係唔脆響鈴嘅結實版，
另外豆角、木耳、蘿蔔、筍果啲配料，始終比「新鮮」嘅都係爭啲，
乜都好似唔係好夠爽口同埋口感霉霉地。
呢包貴過普通果隻螺螄粉，因為佢有隻鴨腳，都係我最期待果部份嚟。
佢老味，霉嘅，食落唔似食物，啲皮好似食紙咁。
我本身食辣嘅極限只係熱浪薯片，食呢個都係夾硬喪飲水咁食，
其實唔係好食到啲嘢乜嘢味，淨得個辣字，食完個口同嘴唇都辣咗陣。
不過我覺得我咁嘅程度都唔算一啖就要放低，食開辣嘅朋友應該唔會覺得佢係乜嘢大挑戰嚟。
#螺霸王正宗螺螄粉（¥12.80）
第二包開呢包，基本上同第一包一樣，只係係多咗兩粒鵪鶉蛋，少咗隻鴨腳同大豆絲蛋白條。
呢包我煮好無落包辣油住，想食下佢本身乜嘢味。
個湯係螺螄肉湯料包加酸醋包溝水溝出嚟，飲落就係落咗醋嘅味精湯咁嘅味囉，真係唔係特別好食喎！
啲配料口感同上面寫嘅一樣，味道都係無驚喜，
蘿蔔無蘿蔔味、豆角無豆角味，就係唔係特別好食嘅醃菜味道。
鵪鶉蛋都似我地平時喺香港買到果種滷蛋，但就無咁實同彈。
最正常係腐竹同花生。唯一可以讚好嘅就係啲米粉囉。
可能我買著個唔係傳說級嘅牌子啦，我真係唔覺得呢包嘢上到神枱要專登淘返嚟食喎。
#良呈美陝西Biángbiáng麵（¥13.80）
最後食咗呢包叫Biángbiáng麵，據說係陝西特產，又叫褲帶麵，
其實即係拌麵然後用咗掛皮嚟做個麵底。
配料比上面兩包少好多，除咗個麵就只有一包辣油、拌麵汁同肉燥。
啲掛皮有4.5cm闊，煮起滑滑地，唔係特別彈牙，因為厚厚地又粗，食落粉感有啲重，普普通通啦。
之前果兩包個辣油對我嚟講都太辣，所以呢包我煮好都無落辣油試咗先。
拌麵果個汁大約就係豉油加醋咁嘅味，
啲肉燥陣味有啲似罐頭紅燒乜乜果啲味，瘦肉嘅質地有啲似硬版五香肉丁，
入面仲夾住少少肥肉同啲咁多豬皮，一定唔似新鮮肉㗎喇，但當罐頭肉咁食叫做食物啦。
佢包辣油叫「油潑辣子」，好型。同上面果啲麵果種單純只有辣嘅辣油唔同，
呢包辣油除咗辣椒，入面仲有芝麻粉同花生粉，所以食落多少少深度，
同埋就算落晒成包我都食到，其實唔係好辣。
老實講呢個辣油拎嚟撈麵幾好味，如果香港有類似嘅嘢我會回購，
不過叫我再淘就不了，因為個麵底唔係特別好食，食啲豬肉果陣好擔心自己，
仲要畀運費，圍落唔多著數囉！
螺霸王鴨腳螺螄粉 在 螺霸王鴨腳螺螄粉元素表- 成波之路my ways to get fat - Facebook 的推薦與評價
螺霸王鴨腳螺螄粉 元素表. ... 成波之路my ways to get fat. Jan 5, 2018 · . Timeline photos. 螺霸王鴨腳螺螄粉元素表. Chan Tonguewhale and 2 others. 3. . ... <看更多>