米迦 Micah：小學雞你以為做皇帝咁易啊？
喺中國又派人去意粉國威威，又放陰謀論撩美國，又對外宣稱啲乜嘢「抗疫成功」嘅時候，大家都少不免會認為中國之所以會做出呢啲厚顏無恥嘅行為，係因為佢哋想襯國際間都忙住應對武漢肺炎疫情嘅時候嚟一招「偷天換日」嚟轉移大家視線，令到及後唔會再有國家會將呢場世界大流行嘅疫情入哂中國數。呢一個推斷雖然不無道理，但相比起中國目前嘅實際情況嚟講，「安內」就比「攘外」更加緊急喇。點解咁講？因為中共正面對自習帝登基以嚟，可能係最嚴重嘅政治危機。
《日經亞洲評論》喺今個月十二號就出咗篇報導文章，呢篇文章寫得實在十分之好，入面就寫咗好多大家喺香港新聞上面未必睇得到嘅情況，其文字功力亦都顯示撰稿記者KATSUJI NAKAZAWA果然係名副其實，獲獎級別嘅資深傳媒工作者。喺文中佢由王忠林取代馬國強出任武漢市委書記開始講起。就正如我之前喺直播都講過，王忠林作為地方大員接替財金國企體系出身嘅馬國強，係習帝為首嘅中共中央想緊控武漢地方政治嘅一個舉動，原因大多都係因為中共喺武漢嘅疫情上處理得十分之差，人心渙散，咁以一個威權體制嚟講，對呢啲地方自然要捉緊啲先得啦。唔信？你望下香港咪知。因此王忠林就喺咁嘅情況之下，開始咗佢嘅維穩工作。
中共維穩策略層出不窮，呢樣嘢作為香港人嘅我哋經歷咗咁多年都應該十分清楚嫁喇，不過自從維尼登基至今，中共維穩嘅方式可以話係越嚟越單調，甚至經常弄巧反拙，而王忠林喺最近就正正犯咗呢個問題。王忠林喺三月六日晚上開會果陣講咗一句「要通過多種形式的宣傳教育活動，在廣大市民、黨員幹部中開展感恩教育，聽黨話、跟黨走，形成強大正能量」。然後喺三月七日朝早，中共喺武漢嘅地方黨媒《長江日報》就以「武漢市委書記：在廣大市民中開展感恩教育」為題，報導咗王忠林開會果陣講嘅嘢。點知報導一出，武漢嘅人民可以話就係俾佢呢句嘢點著咗。
當時最尖端嘅批評，就係嚟自武漢嘅一位叫方方嘅作家，佢就喺佢自己嘅社交平台嘅日記上面撰文批評呢種說法。佢就指出「武漢嘅領導要求人們向黨同國家感恩」係一個奇怪嘅思路，因為佢認為「政府係人民嘅政府，佢嘅存在就係為人民服務」。甚至佢重攞出咗武漢大學歷史學系教授馮天瑜教授引用馬克思喺1875年喺《哥達綱領批判》上面講嘅說話，當時馬克思批評拉薩爾嘅「國家至上論」，就話「需要人民對國家進行極嚴厲的教育」，藉以說明人民係唔應該向政府感恩，反而係政府應該接受人民批評。
喺呢度先唔講方方知唔知佢自己身處嘅國度叫「中華人民共和帝國」先，但王忠林明知人心未穩嘅時候就要講出呢啲明顯會點著啲人嘅說話究竟係為咗啲乜呢？本來個個都諗唔明點解會咁做，只係當王忠林下咗一步臭棋，但到之後大家見到喺武漢嚟咗個咩人，我哋就唔難明白王忠林嘅呢句「感恩教育」，其實就係為咗皇帝出巡，維尼及後訪問武漢嘅呢件事而鋪路。
明白咗呢一點之後，我哋知道王忠林嘅目的，咁究竟中共想點維穩呢？就係玩偷天換日，將中國嘅「抗疫」換成為維尼嘅功勞。而其中採用嘅方法就係威權體制國家最中意用嘅招數：政治宣傳 Propaganda，以「攘外」嚟「安內」。
黨媒新華網喺今個月四號就出咗篇文叫做《理直氣壯，世界應該感謝中國》，入面就用咗呢句嚟做總結：「現在我們應該理直氣壯的表示，美國欠中國一個道歉，世界欠中國一聲感謝，沒有中國的巨大犧牲和付出，就不可能為全世界贏得寶貴的抗擊新冠肺炎疫情的時間窗口，可以說中國一己之力，硬生生的將新冠肺炎疫情擋住了很長一段時間，真的是驚天地、泣鬼神！」
先唔講呢段說話入面嘅無恥指數已經已經高到超出銀河系，好明顯中共呢段說話並唔係真係對住美國又或者對住全世界講，亦都唔係要同全世界做「感恩教育」（雖然唔知點解啲意粉佬真係會上當），其實呢個係佢哋嘗試營造一種「因為中國自我犧牲拯救世人」嘅概念俾佢哋嘅人民。由於之前維尼被政治宣傳捧為「防疫總指揮」，一但中共成功解決疫情嘅話，咁維尼就會變成救世主，令到當維尼宣布「抗疫成功」果一下，果種「中華民族偉大復康」嘅史詩感就足以俾佢哋Ace Combat 快打用喇。不過一招就當然係唔夠嫁喇，另一招玩法就係中共經常用嘅一招，而呢個就同去咗武漢嘅國務院副總理孫春蘭有關喇。
孫春蘭喺早上個星期巡視武漢嘅一個社區果陣，就受到突如其來嘅叫聲侵襲。當當地嘅官僚一早為呢個行程洗太平地，安排好哂齣戲點樣做之後，孫春蘭巡視嘅嘢當然係造出嚟嫁啦，因為喺當時果個社區入面，樓上傳嚟好多叫聲，例如話「我哋被逼住要買啲貴食物啊」、「所有嘢都係造假啊」之類嘅說話，正正就係被錄低咗，而且呢段片段亦都被上載到唔同嘅圍內社交媒體。而最奇怪嘅就係，呢段片段你係重有得喺牆內睇得到。當你認為「中共白痴仔，咁都Del唔到」嘅時候，其實你可能已經上咗佢當，因為呢個係一個好明顯用嚟維穩嘅權術操作嚟，就好似中國四大名著之一嘅《三國演義》入面就有一段咁嘅故事。
《三國演義·第十七回·袁公路大起七軍 曹孟德會合三將》入面，曹操征討自立為帝嘅袁術果陣，因為缺糧嘅問題煩惱不已。當時佢嘅手下倉官王垕就上報曹操同佢講糧食唔夠，曹操就叫佢用個細啲嘅碗每個士兵分少啲俾佢哋，夾硬頂住先。王垕又問如果啲士兵投訴得咁少糧嘅話點好，曹操就話佢自有處理方法。之後果不其然士兵就當然係個個都挑蝦拆蟹啦。然後見到咁樣，曹操又召王垕入嚟，同佢講話想問佢借一樣嘢嚟安撫士兵。王垕就問係咩，曹操就話要借佢個頭去示眾。王垕當然好驚，就話佢自己都無做錯，曹操就答王垕話佢當然知道王垕無做錯，但唔借佢個頭就話，軍隊就會嘩變，然後曹操就講咗一句「汝死後，汝妻子吾自養之，汝勿慮也」，就推咗王垕出去梟首示眾，然後軍心就平穩返喇。故事講完，用返港漫《火鳳燎原》嘅概念，呢個就係三奇賈詡最中意用嘅「公子獻頭」嘅原型。其實套用返現實，個道理都係一樣。
喺清楚明白呢個道理之後，我哋就會明白，目前中共所允許嘅所有「批評聲音」，都係中共默許之下嘅操作嚟。唔係話寫果啲人係做媒，而係中共某程度上係利用緊同一套方式嚟一招「公子獻頭」就可以平定民心。呢招中共一直都有用開，亦都令唔少嘅人中伏，玩起「只罵貪官，不反皇帝」嘅把戲，就係正中中共下懷。嗱你唔好笑啊，香港信呢套嘅人都比比皆是嫁。
不過其實用邊招維穩都唔係重點，因為如果本來都唔穩嘅話，你點維都好難會穩，所以真正決定中共有無辦法又再一次將人民不滿壓住嘅核心問題，就係呢場疫症係咪真係可以被佢哋完全平息。否則的話，就算佢再玩幾多花樣都無用，因為解決唔到件事嘅話，維尼就出師無名，喺呢場抗疫行動就如同一個坐喺上面食花生蜜糖一樣，毫無建樹，到最後就會要用上硬招。問題就嚟喇，嚟硬招嘅話，「中華人民共和帝國」嘅子民又會唔會有種反抗呢？咁就真係要到果時先知喇。
至於作為一個香港人，喺呢啲事上面又有啲乜嘢啟示？無嫁，呢廿九幾年你重睇唔夠呢啲馬騮戲咩？但係唔知點解睇咗咁多年馬騮戲嘅某部分香港人，都總係會對呢班馬騮有任何幻想。不如聽日就等我嚟講下，方方同上面我講過嘅某部分香港人嘅諗法究竟有啲乜嘢相似之處，點解會被人利用咗嚟維穩，而呢啲諗法又會有啲乜嘢問題啦。
#武漢肺炎
#維尼之永世帝位
#寫咁長肯定又無人睇
延伸閱讀：
https://asia.nikkei.com/Editor-s-Picks/China-up-close/Campaign-to-thank-Xi-Jinping-flatly-rejected-by-Wuhan-citizens?utm_source=share&utm_medium=ios_app&utm_name=iossmf
袁春望原型 在 袁春望原型、王茂蕾結婚在PTT/mobile01評價與討論 - 手搖飲社 ... 的推薦與評價
王茂蕾結婚在PTT/mobile01評價與討論, 提供袁春望原型、王茂蕾結婚、袁春望ptt就來手搖飲社群資訊站，有最完整王茂蕾結婚體驗分享訊息. ... <看更多>