【賽後分析】
.
我知今晚打錫菲聯😂我知我係遲左出文😂唯有講遲到好過無到啦😂
.
經歷賽和狼隊、擊敗般尼過後，車路士應戰熱刺將會係杜曹上任後既第一次重點考驗，最終以佐真奴射入十二碼擊敗前藍軍領隊摩連奴帶領既熱刺，雖然比數上以小勝作結，不過比賽進程中既內容可以話顯現出雙方主帥既排陣調動鬥法，內容話題可以話相當豐富。
.
杜曹繼續源用近兩場既後場球員作正選，反而著手於前場球員作調動，三中堅防線維持艾斯派古達、泰亞高施華以及魯迪加三人，左翼衛亦繼續以馬高斯阿朗素作正選，而右翼衛方面將上兩場都打哩個位既奧岱推到前線，換上列斯占士打哩個位，中場方面有簡迪復出先列後備，源用高華錫同佐真奴為雙中場，而奧岱、添姆雲拿以及蒙特就作三攻堅。
.
先睇返杜曹既賽前佈置，依舊選用一啲硬淨既球員作為主要後場元素，其中保持馬高斯阿朗素作為正選以及換上尼爾斯占士就係最明顯既操作，加強後場硬度希望喺處理一啲應付死球或角球時既身體對抗都唔好過份輸蝕，而正當以為三位攻擊球員開賽時會各自企位於左、中、右三路時，反而喺吹哨後發現只有添姆雲拿企喺一個中路偏左既角色，奧岱則被移入負責中路靠右既位置，而蒙特既位置就比較自由流動，杜曹安排左佢打一個好似首場薛耶治擔任既角色，自由流動地去各個區域配合其他隊友，並無限制佢需要喺指定地方出現。
.
而蒙特亦的而且確發揮得出相當高水平既表現，無論喺回後攞波推進還是前場策應組織都擁有相當亮麗既數據，多次背身接應繼而立即起動果下亦迫使對手需要透過技術犯規去阻攔佢，哩兩場波都見到蒙特非常上力，可以話係杜曹上任後其中最亮眼既一員；至於今場波被移入中路既奧岱，上半場亦都相當活躍，多下都能夠喺中路同邊路製造到具威脅既攻勢，相信適應到位置上既轉變後奧岱能夠為杜曹提供到唔少位置上既變換空間。
.
喺上半場車路士可以話拎到唔少操控優勢，熱刺所搵到既空間並唔多，零星既反擊機會都好容易喺入到藍軍禁區前自行斷纜，雖然車路士都製造到唔少進攻機會，不過始終都只能夠係威脅畫面，一直都無法轉化成真正入球，如果唔係迪亞一次魯莽既犯規要先輸十二碼，相信今場波係絕對有機會要握手而和，而其中除左蒙特既表現值得關注之外，高華錫喺中場既輸出亦為球隊提供到重要既主素。
.
杜曹上任後既三場依舊維持高華錫同佐真奴哩對中場組合，某程度上除左因為簡迪受傷外，哩對組合所比到球隊既控傳元素可以話係喺英超黎講繼曼城之後數一數二既，當然，喺最後一傳同射方面可能未必係佢地既強項，不過在於喺依加球隊既戰術上需要維持高壓迫以及以傳控作為主要套路之下，高華錫同佐真奴之間既連接、互傳解困同為後場減壓能力可以話相當重要；而喺下半場換入簡迪後，在於後者傷癒復出需時提升狀態，加上高華錫場接場打得實在太多，簡迪無論喺解困同壓迫被比下去，與此同時熱刺亦係賽事尾段加強攻力，引致場面上出現簡迪換入後球隊出現較多危險畫面既交錯情況。
.
不過無可否認既係，高華錫自加盟至今依然難然維持全場九十分鐘既體能輸出，而同時簡迪亦的確需要上陣時間適應，中場方面相信餘下賽程都仲需要佢地三位持續輪換；而黎緊馬上要應付對錫菲聯既賽事，希望泰亞高施華不用傷勢不太嚴重吧...
.
《岩睇既比個Like支持我地啊！》
作者 : BluexLion車迷手記
圖片來源 : adduLIVE
-------------------------------
同場加映《令車迷們「瘋狂」的一個暑假 淺談藍軍大灑金錢的一個轉會窗 – 後場篇》
https://bit.ly/2T6r2YE
.
#Chelsea #車路士 #杜曹 #熱刺
https://s.fanpiece.com/5z2tuqW
