關於 讓我慳Ｄ慳Ｄ應該好快能成為賢良乜太 ，我們在網路上蒐集到這些相關的討論、資訊與評價

話說人妻先生成日俾人話我炫富，我想講唔係呀嘛？如果你搵到我用一件名牌，你贏（太陽眼鏡係生日禮物唔計）；如果你搵到我去超市買菜無一件係貼著到期清貨大減貨，你贏；如果你搵到我在過去十年內用正價買任何一件衫褲鞋襪，你都贏！

但點解硬係覺得你呢條粉皮好似過得好好咁？係架，我日子係過得好好，但也不用富有才能過好日子嘛... 我呢係典型屋村仔，細個窮慣（但卻被寵得不得了），後來爸爸做生意賺了點錢也過了一陣好日子，不過最後還是竹籃打水一場空，但我還是活得好好的。到了後來剛出社會工作，我每日用20蚊解決三餐，三蚊的芝士漢堡和四蚊蘋果批係我的好朋友，做人唔可以忘本，所以你見我寫文兩年，一次都冇婊過麥當勞。

我覺得我這個成長經歷最大的啟發是：窮風流、餓快活，人窮但志不能窮，窮不一定是苦，再窮也可以被寵愛的，起碼身邊家人和朋友齊齊整整，能夠愛人，也能被愛，已經足夠感恩。哪怕是現在生活算是過得不錯，不用憂柴憂米，我還是拒絕去買那些名牌，孤寒當然是主因，但更重要的是— 我不需要用消費去購買快樂。

我每天都很快樂：返工上司寵我九點半返工例遲唔會鬧、同事待我很好— 台灣個大呀頭尋日先send封電郵CC我上司讚我（仲要讚我把聲好溫暖），返工很減壓也很有成就感；午飯一係去做兩個鐘gym，如果唔係就醫生仔同律師仔兩個梅花間竹陪我食飯盒（其實仲有個打欖球的，我日後再介紹吧），五點準時放工，一係落吧俾仔溝、一係去超市執即日到期減價貨，返屋企煮飯俾老公食。食完飯嗲一陣老公睇下電視同漫畫再順手寫文婊揚好人好事，咁又一日，難道我還有什麼缺失，需要去用消費填補嗎？

所以，我不會炫富，因為無富可炫；但是我會曬幸福，因為我太多幸福，多到可以同大家開心share。

真係唔好意思，明明今日係 #飲飲食食最開心 ，結果都要大家聽我講耶穌。咁好啦，今日我地唔炫富，我炫窮— 帶大家食埃塞俄比亞菜！

倫敦係一個國際大都會，咩國家嘅人都會有，加上地方租金唔太貴，所以就有好多特色餐廳的誕生了。

首先，埃塞俄比亞菜原來係辣架！！！基本上係一大碟的「酸pancake」，上面擺上各種蔬菜、碳烤雞肉、類似巴東牛肉的燉牛肉、還有一大堆酸酸辣辣的醬和說不出名字的豆蓉，香料甚重但不致失衡（係香料，唔係味精好不好），用手抄起酸pancake放進口，每一口都是放煙花那樣的豐盛，是一種很粗糙卻又令人欲罷不能的美味！

另外，我要吐糟一下：埃塞俄比亞不是常常饑荒的嗎？為什麼這麼一大盤的？！你看看第二張圖，呢碟野仲大過我成個人！雖說是兩人分享，但三個大男人都吃不完，更不用說侍應還會給你瘋狂添食酸薄餅，這樣一盤約25鎊（250港元）真的不會賠本嗎？對了，另一個的好處係對比之下，影相出黎，就算我呢啲pizza面肥仔都會顯得好瘦🙈🙈🙈

飯後，我又唔識死，走去點左杯「傳統咖啡」，正當我諗緊十鎊（100港元）會俾到啲咩我的時候，侍應就捧著燒紅了的鐵碟出來到我們面前— 係呀，即場炒兩下咖啡豆俾你睇！那種焦香咖啡豆的芬芳，真係令人有高潮的感覺，豐郁到不得了！

所謂埃塞俄比亞傳統咖啡，即叫即炒即沖一大壺，還會附上一大碟爆谷佐咖啡，旁邊焚一柱香，與咖啡的香氣相得益彰。由於是晚上的緣故，一桌六人都在說「喝一點就好，怕晚上睡不著」，好吧，每人倒一點吧，大家喝了一小口...... 唔？！！！

太香醇、太甘甜、太豐郁了！

接下來，大家就默默地自動續杯。係架，係會訓唔著架！但這麼好的咖啡，真的能捨得不喝嗎？寧不知、傾城與傾國？佳人難再得！

#埋單每人二百蚊港紙都唔駛
#炫窮界KOL
#人可以活在貧窮
#但唔可以活得唔幸福
#埃塞俄比亞的咖啡豆真係一絕
#飲完再唔能夠面對starsuck啲咖啡味糖水
#但我訓得超好的
#豬屬性無誤
#呢間野交通好唔方便遊客可以死心了
#讓我慳Ｄ慳Ｄ應該好快能成為賢良乜太
#讓我慳埋慳埋否則怎可儲錢去街街
#讓我慳Ｄ慳Ｄ能窮得有樂趣未拍捱
#慳D

由於尋日西門梓衝出黎做架兩，搞到我今日放工先有時間寫食評。

尋日我同我老公去左Athenaeum酒店的Galvin食tea，呢間餐廳座落於倫敦高級酒店林立的Mayfair，由米芝蓮餐廳的前大廚主理，Royal Afternoon Tea收費37.5鎊一位，以英國下午茶黎講價格屬於中上，當然，我期望佢唔止俾到中上水平的食物啦。

首先，下午茶當然要點茶吧？平時我喜歡點立山小種或是鍚蘭紅茶，這次就試一下Gunpowder Green tea (珠茶)，老實說，味道很淡，若果不仔細品味，還真的喝不出個層次，和點心並不配襯。不過，這回是我自己失手點得唔好，唔好賴人。

接下來，都係講點心吧！英式下午茶講黎講去都係三樣野：三文治、鬆餅同甜品。我通常先食鬆餅，因為鬆餅係三者之中最考功夫，外面要脆，內面要軟，個身要爽但唔可以乾，必須要趁熱食，擺耐左之後，乜野鬆餅都唔會好味，對廚師公平一點，還是先食為敬。在餐刀上稍稍用力從側一壓，輕易切開，牛油香氣撲鼻而來，我就知道這次走運了。不抹任何果醬咬一口，只有牛油和麵粉的甜味，沒有臭粉味，令人驚喜！隨鬆餅送上的三小罐，分別是自家製的藍莓醬，Clotted cream和「聖誕醬」。藍莓醬亦酸亦甜，非常醒胃，但相較Clotted cream，就真的遜色了一點，是的，英式下午茶鬆餅不會配牛油，而是配更加濃香幼滑而略帶鮮甜的Clotted cream，看似肥膩卻是入口即溶，纏綿地包裹著你每一顆味蕾，頂級的鬆餅，就該配頂級的Clotted cream。而聖誕醬嘛…這是冬季限定的特殊抹醬，充滿肉桂與丁香，閉上眼吃一口，彷彿聖誕提早降臨，我老公童心大發，超級喜歡這個抹醬，結帳時特別跟經理大力加許一番。

說三文治吧！這裡四款都是常見三文治，卻又匠心獨運地出現不同的變奏。蛋沙律和蝦的組合是很經典的，這次換上小龍蝦，也是四平八穩之作。火腿三文治本來也很普通，但廚師在裡面配上果醬，咸咸甜甜的，是一種很聰明的配搭。青瓜三文治，明明就是青瓜和沙律醬，我頂多發現沙律醬裡混了一點香芹，但味道卻是非常清新，人人都說三文治簡單，其實也講究心機，怎樣在這一方寸的空間裡把味道演繹到極致，考起不少廚師。說到最後一件的咖哩醬雞三文治，和之前青瓜三文治的清新構成強烈對比，帶來淘湧澎湃的滋味，當中還加入少許的薑，為味道推波助瀾，令人喜出望外。

對了，吃完三文治才記得影相？不要緊，這裡的三文治是可以添食的，跟侍應哥哥說句秘密咒語「還原基本法」，他就會幫你Refill，原碟再上，再影再食，結果我同我老公食左兩碟三文治，非常滿足。（拿，講真食得曬先好嗌，浪費食物的人，生仔智商會同西門梓一樣架）

然後是甜品，怎樣說呢？我發現這餐廳對於忌廉、醬料的掌控完全是爐火純青的境界，那個其貌不揚的香橙巧克力cupcake絕對是教科書水平的作品，而藍莓撻底層的綿滑到吃完吞掉也沒發現自己吃掉了，可惜餅底太厚太硬，毀了一味絕世好醬，情況尤如一個飄逸若仙的小龍女在半空飛舞，一落地睇真啲，頂，原來係李私煙扮嘅學生妹，令人來回地獄又折返人間。食完呢一碟後，其實仲有一碟後上的cake platter，要是你意猶未盡，還可以挑戰一下，我同我老公已經飽到反肚，所以都係打包拎走就算了。

總的來說，如果你係訂2:30下午茶，將佢當午餐加晚餐一口氣食(相信我，你食完唔會食得落晚飯)，37鎊除開兩餐，都係18鎊左右，以呢個水準來說係好抵。好多人以為窮遊等如要食垃圾，其實唔係架，你如果識得安排時間同行程，你都可以奢華地「窮食」下午茶。

#其實我用Open_table訂位
#佢聖誕季節加左價但唔記得上網改返個優惠
#結果我係用31鎊的特價埋單
#讓我慳Ｄ慳Ｄ應該好快能成為賢良乜太
#識唱一齊唱
#所以話同marketing溝通好重要
#做marketing成日都俾人溝
#唔溝點會通姐
#提提各位marketing朋友聖誕唔好出錯價
#有冇人真係信左秘密咒語係還原基本法呀
#其實佢會主動問你要不要再來一round的
#你試下同佢講反清復明睇下有冇機會解鎖隱藏服務
#隱世小店
#隱世米芝蓮下午茶
#五星級酒店邊度隱世呀