【告別Google Map】破解隱藏套丁地 升級地圖技術全攻略
好多人問本研社研究員平時究竟點搵地同點樣分析大量嘅土地資料。其實唔係咩秘密，我哋主要係運用地理資訊系統(Geographic Information System, GIS)工具，將啲空間數據(spatial data)有系統咁整理、分析，我哋唔少嘅研究就係咁樣誕生㗎喇！以往我哋發佈報告用嘅GIS 工具係Google Map， 功能方面確有限制，例如圖層(layers)數量有限。
唔知大家有冇留意，最近我哋幸得友人技術相助，今次我哋發佈《草木皆丁－發展新界潛在違規丁地可行性研究報告》嘅地圖資料庫，已經靜靜地升級咗做「ArcGIS online」版本 。
【研究神器升級】草木皆丁地圖資料庫即刻睇：https://bit.ly/3b3skNc
內裡紀錄著全新界潛藏潛在違規丁地嘅地圖庫已全面開放，絕不收費，市民大眾可以隨時、隨地參閱同使用今次研究地圖庫嘅數據，繼續跟進違規丁地最新發展，有助將研究成果貨如輪轉，成為其他民間團體嘅倡議同研究養份。
「ArcGIS online」除咗地圖底圖可以更多選擇外，表意上亦比Google Map 更為清楚。更加重要嘅係，佢嘅地理資訊分析能力，亦比Google Map 強大。現時潛在套丁土儲地圖庫嘅地圖圖表(attribute table)，包含每塊潛在套丁土儲嘅名稱、大小、涉及丁屋數量以及所在鄉村，將會連結空間圖徽(feature)，格式統一的地塊資料唔再單純為描述文字，而係可經整理同分析嘅數據。因而，今次經升級的地圖資料庫可以呈現更加清晰簡潔嘅資料分類，有利日後民間繼續對違規丁地跟進調查、趨勢統計以及空間分析。
以往我哋依賴嘅Google Map 有圖層(layer)功能上嘅限制，最多只能放10層圖層。圖層限制令我哋無法將大量嘅空間數據放喺同一檔案中整合分析，例如由於全港地段索引資料過於龐大，很難將地段索引資料直接置放於google map之上，變相難以全面地搜挖全新界潛藏套丁土儲，而「ArcGIS online」突破咗Google Map 喺圖層(layer)功能上嘅限制。
《草木皆丁》之所以能夠完成，全靠ArcGIS online中增加咗圖層數量嘅特點，對現有鄉村範圍、鄉村式發展用地、政府丁地、地段索引圖、新發展區規劃圖、甚至2017年棕地分佈等等多個圖層數據進行大量cross-checking嘅工夫。除咗快速地識別出現時787個潛在套丁土儲的表徵，亦從中揭發出哂界的潛在套丁土儲、「先破壞，後套丁」侵蝕濕地漁塘的可能以及新發展區收地故意避開原居民村等個案，搜挖出這些潛藏違規丁地多方面的問題。今次大家將會見到更加「花哩花碌」的新界，視覺化地呈現新界「騙」地開花。
今次本研社升級地圖工具，與其話方便咗我哋做研究，其實目標係更多為鼓勵民間共享、保存及再用這些土地資料，務求逐漸建立民間土地資訊共享平台，實踐協作式研究，培育民間研究力量。
下一步，我哋計劃將過往多年地圖資源上載至ArcGIS online，以提升民間土地資料庫完整度及品質。遺憾嘅係，每解鎖更多圖層限制，所牽涉嘅開支亦會增加，暫時我哋無法負擔。
現時尚未能夠「解鎖」嘅資料例如:
- 富豪短租官地分佈地圖
- 中港地產商在英國的住宅項目分佈地圖
- 1993、2003、2017年新界棕土擴張歷史軌跡與現況地圖
- 新界西北魚塘業權分佈地圖
- 香港隱藏臨時使用及閒置官地地圖
最後，面對現時資訊自由日益收窄，隨時有「被下架」嘅可能，因而建立民間土地資料庫倍加重要。希望有心人可以懲罰是次升級，對我哋民間土地資料庫嘅經營同維持有所支持！
#絕非廣告
#揭露丁權自肥計劃
#民間研究方法升級
#土地資訊已Backup
配合住全新界「騙」地地圖庫，有興趣可以喺以下連結細閱埋研究報告，冇咁多時間細讀，都歡迎望下個簡報同大大力share俾朋友：
《草木皆丁》報告全文：https://bit.ly/3nFeDcA
《草木皆丁》研究簡報：https://bit.ly/33b66EQ
希望各位可以繼續支持我地嘅丁屋研究工作，有餘力可幫忙懲罰是次研究嘅基本開支，高質研究必定會陸續有嚟！
— 是次研究基本開支 —
資料整理：$2,500
安心查冊：$3,000
內部印刷：$1,000
報告推廣：$2,000
落地考察：$2,400
研究員心力：無價
= $10,900 (抵到爛，其實駛乜收地產商錢)
︴支持研究丁地 需要懲罰我地 ︴
▍自訂金額支持丁屋研究工作
https://www.paypal.com/cgi-bin/webscr?cmd=_s-xclick&hosted_button_id=ACP8TJDJNZP4J
▍FPS ID：5390547
▍HSBC PayMe 捐款支持：https://bit.ly/32aoOMn
▍月捐支持：https://liber-research.com/support-us/
研究義工大招募報名：https://bit.ly/2SbbyT3
