今日睇新聞，見到RENTCafé做左個報告，睇下大約萬二蚊港元(1500美元)可以在全球租到幾大的房間。當大家以為香港一定係排第一的時候，恭喜晒大家，香港只係排第五（租到316尺），三甲係紐約(277尺)、倫敦(301尺)、蘇黎世(314尺)！
由於我唔係統計系KOL，所以數據上佢咁講我就咁信啦下。但係，如果淨係睇數據，很容易得出「香港樓租平過倫敦」這個結論，但事實又真是如此嗎？
在香港租樓，我老公租過山頂亦都租過一號銀海，貴就當然不在話下，但每個月俾幾萬蚊租，究竟租左啲乜野？山頂間屋係大呀，但係有小強，源源不絕的小強，老實講如果我要揀住一間有鬼嘅屋同一間有小強嘅屋，我會義無反顧咁即刻衝入去鬼屋度訓，鬼屋我當多個roommate而佢仲唔會偷食雪櫃啲野食。除了小強外，大家都係排得密密麻麻，所以個廳就冇乜景，最叻就係個睡房有維港景，喺廳度問人「不如過隔離睇下維港夜景？」呢招溝仔萬試萬靈。而那個該死的一號銀海，月租都唔平，望住個大海景，你試下打開個窗？臭到好似住坑渠咁，真心崩潰。倫敦樓宇密度低很多，你點可能搵到一棟四十層的住宅而你可以喺廚房裝呀對面屋陳生沖涼架？
如果只係多小強、密度高無私隱、臭，都算了（其實咁糟糕點可以算數？），最慘係香港的奇則：咩大窗台、鑽石型廳，呢啲真係在外國聞所未聞，你多人地倫敦15尺都要真係用到嗰尺先得架！外國樓大家正正常常四四方方，畀一尺你真係可以用一尺，香港樓鬼鬼祟祟，畀多一尺你，你真係寧願佢拎返走，用又用唔到，盞業主交更多管理費，真係撞鬼～
對比樓價和租金，我個人認為更要比較樓宇本身的環境和質素。要是你座北向南倚巒傍水、上有青天白鷺，下臨綠澤黃舸，實千金而不足惜；但香港左高樓、右大廈、前天橋、後公路，訓喺和合石嗰班個景都靚過你，你除了「斯是陋室，惟吾德馨」之外，你仲有咩好講？
拿，唔好話我成日都唱衰香港啦，我地用事實說明一切。邊個唔服氣嘅，同我行出黎，我同你一齊打開個全屋所有窗一星期，七日後邊個仲可以生存到，就係贏家。我倫敦呢邊排緊第二，水深火熱架。（笑）
新聞傳送門：http://businessfocus.presslogic.com/2017/…/21/article/37338/
圖片來源: 蘋果日報
#你大我呀
#開窗啦你開窗啦嘛
#我睇死你市區多廢氣
#近山多蚊
#近水又係臭
#唔熱死都焗死
#香港唔係inexpensive
#而係cheap
#另外呢倫敦樓幾十年歷史都仲住得人
#香港五十年叫危樓
#依家起樓需要講良心嗎
