［海航就賣快運，錦湖就賣ASIANA］是咁的，我2015年年尾，即係37歲人，先第一次去日本，同年亦都第一次去韓國。過聖誕添，幾威。其實冇乜氣氛，不過落雪咁解。我仲要騎呢過人，第一次飛係飛金浦（對，逆權司機個機場，後來我在仁川機場見個港仔同港女講就想恥笑，當年有撚仁川機場咩），正如我第一次飛日本係福岡（唔算好偏門啫），第一次飛德國係飛不來梅（夠型啦掛）。
前前後後冇特別數坐過幾多次韓國航空公司，但居然都坐過好多間，都幾神奇下，特別係除咗去濟洲外韓國國內唔會坐飛機（去釡山梗係屍殺列車啦）。但都比我坐過五間韓國航空公司。
分別係乜？濟洲航空啦，EASTAR JET啦，首爾航空啦，真航空啦（大韓航空嘅廉航，早過國泰好多啦），仲有今日要講嘅韓亞ASIANA
冇坐過嘅呢？釡山航空啦（都話屍殺列車，而我又唔會直飛釡山），仲有間叫T'way嘅幾乎坐咗（即係冇坐過，正如我都幾乎入咗高盛，幾乎04年買咗樓，幾乎十蚊買咗騰訊），呢間嘢極之騎呢，個名又怪雞，隻色擺明係蕃茄（雖然官方好似冇講），而大股東係：大韓民國番茄儲蓄銀行（好似擠提定乜爆咗煲，番茄汁擠到周圍都係）。
不過最遺憾，就梗係冇坐過大韓航空。真係細細個已經識。當年咩出名？梗係唔係空姐靚，而係出名危險，本身啲安全紀錄又差，仲要成日劫機（多得北方的麻煩鄰居）。
不過呢啲都係細個啫，到真係懂性，冇得傾，大韓航空就只係諗起，靚女。甚至都未係到韓妹年代。一個張栢芝（拍戲啫，十二夜嘛，你睇嗰個年代空姐仲係比較有格嘅性幻想對像，仲有周嘉玲），一個陸詩韻（呢個就真空姐，飛汶萊添）。
講返，丁屎咁細仲要冇國內線（除咗濟洲）嘅韓國，居然八間航空公司，所以你諗都諗到係咩後果。韓國啲機票長期都平，首爾去濟洲更加係坐巴士一樣，你去到機場買都仲得，反正密過巴士，呢班唔得就下班。
咁玩法，就梗係鬥快執笠啦。幸好，其實所謂八間，有五間都係兩大集團嘅。頭先講咗啦，真航空係大韓航空嘅廉航，而兩者都係近期十分多事嘅韓進集團（原本想寫，冇時間），剛剛創辦人畀人趕走，死埋，股價就大升，夠諷刺。
濟洲航空，T'way同埋EASTAR JET就獨立嘅（表面）。而剩返韓亞ASIANA，釡山航空，同首爾航空都係錦湖韓亞集團的。
好啦，話說韓亞ASIAN一路啲營運都麻麻地（唔係服務上，講財務上），母公司錦湖韓亞都係有壓力。結果又好似海航咁，賣仔咯。而家話會賣韓亞ASIANA嘅三份一股權，昨日股價一升就三成，三年新高。快運同港航冇上市，恨唔到了
不過要講嘅係，你睇返之前股價，成萬WON碌落嚟三千幾，而家彈返就七千幾，還可以啦，過去三四年買你一定賺錢。
問題係，其實啲股價三月尾已經係咁抽。冇科勞韓國新聞，但你話冇insider我死都唔信。不過韓國，係咁架啦（其實度度都係咁）
話咁快，就八間可能變七間。睇個款咩T'way都唔會玩得耐，有機會坐下，睇下飛機餐有冇蕃茄食。
（最新：今日升多兩成）
陸 詩韻 幾多 歲 在 Sharon Luk 陸詩韻 - Facebook 的推薦與評價
Sharon Luk 陸詩韻 . 2023年6月18日. 都唔記得幾多歲了，應該兩歲 好明顯喊完，扭計… 老豆右手抱住，手上面仲揸住副太陽眼鏡，型 ... <看更多>