【老屎忽同小學雞分享系列】
你地成日講咩電競KOL，我個年代只有打機界架咋，所謂打機KOL係有電玩太郎同朱天堂，打機最勁果個叫軍佬神唔係梅原大吾，打機最高殿堂係深水埗長江而唔係EVO，OK？（仲有Gameplayers個福田寫嘢我都幾鍾意）唔係咩大J屎萊姆囉好心……講到我好熱衷於撐邊個反邊個咁…
【#昔日回憶】元祖級Game評達人──電玩太郎
呢一代香港嘅機迷，一講起打機紅人就應該會諗起達哥。但如果年紀係35歲以上，佢哋講名字好大機會係電玩太郎。
响年紀大啲嘅本地機迷心目中，電玩太郎可以話係陪住佢哋成長，包括舊仔。舊仔大概响小學期間已經知道有呢位Game評人，睇返資料佢本人姓陳，成名之地就係《新報》副刊，當時任職排版嘅佢做做下寫埋遊戲版，記憶中個版係叫「電玩天堂」，電玩太郎亦係佢嘅筆名。而佢最出名嘅，就係製作超詳盡嘅RPG連載攻略。唔少人為咗佢份攻略，日日去買新報。雖然呢個版做到有聲有色，但後嚟好似因報社cut版而呢班寫手同編輯都要離巢。之後電玩太郎就創辦咗綜合遊戲雜誌Game Weekly，亦因為電玩太郎呢個金漆招牌所有吸引咗好多捧場客。Game Weekly雖然近年聲勢不再，但無損電玩太郎响大家心目中嘅地位。記得兩年前PlayStation 5億台紀念企劃專訪，就搵咗佢講講同PlayStation嘅「情緣」，唔少機迷睇完呢個專訪都好感動，因為大家都覺得佢响本地遊戲界真係好有代表性。
呀！Game Weekly出咗喇！大家不妨去買返本睇下。
