《複製人徐福》衰貪心
放棄了睇《Chill Club推介奬》決戰《歡樂今宵之開心大綜藝》，去了睇《複製人徐福》，觀後感是早知去睇早場啦，慳一半票價，咁先啱數，套戲除了孔劉和朴寶劍好靚仔外(對他們的粉絲來說)，但偏偏睇靚仔唔係我目標，劇情方面實在貪心，瓣瓣掂下，但無一瓣突出，兩頭唔到岸，不如集中攻一瓣娛樂性，可能無而家咁尶尬。
故事主要講大財團研發了複製人徐福(朴寶劍)，他有令人永生的能力，因此惹來各方勢力要消滅他，前特工閔奇憲(孔劉)，奉命保護他，由離開實驗室開始，他們便受到連番狙擊，閔奇憲多番帶徐福脱險，但同時發現他有意想不到的超能力，與及韓國電影必備原素，催淚的身世，他可以完成任務嗎…
關於徐福的設定，其實有大有克洋《阿基拉》和Michael Bay《謊島叛變》(The Island)影子，如果導演想拍一套票房為主的娛樂性電影，不斷鎗戰、飛車、爆炸、特技…，其實無問題。但明顯導演野心更大，透過徐福的永生能力，想同觀眾探討生死的意義，死亡並非壞事，永生也不見得令人幸福，這些形而上問題，隨時講五、六個鐘都無答案。除此之外，還要建立兩位主角兄弟情，鋪排徐福天真爛漫，惹人同情身世，終於令到中段變調成節奏緩慢，深度行先的文藝片，但討論唔出任何結果，又突然變回動作片，各方追殺勢力來到，徐福力量失控，跟住有點草草收場。
成件事關鍵就係衰貪心，樣樣元素都想放入去，但又掌握得未夠火喉，連特技都係未到水準，唔會話佢差到好離譜，不過不符預期，因為我唔係為睇靚仔入場。
#複製人徐福
