#世界將我包圍誓死都一齊
//壯觀得有如懸崖的婚禮，也許生於世上無重要作為，仍有這種真愛會留低...// 黃偉文 (這些文字不屬於楊千嬅)
唔知道係咪時代選擇咗我哋，定係我哋選擇咗呢個時代。我哋剛好選擇咗喺呢個最差嘅時間去走到人生另一個階段。困難當然好多，無論你同我身邊都有好多包圍着我哋嘅艱辛... 結束培訓室、放棄做導演、轉工，甚至要離開屋企... 大部份都係無可奈何...
唔緊要！就讓我哋手拖手去面對，就好似嗰一日我哋手拖手穿越邪惡嘅煙霧一樣，所有嘅苦難只會令到我哋更加珍惜對方，更加珍惜每一刻。
面對着用生命去見證嘅見證人：
「我拖住你嘅手，我承諾會照顧你，我愛護你嘅心唔會因為關係唔同咗而改變，係呢段關係中，你仍然可以做返你自己，我亦都會做返我自己。我不附屬於你，你亦不附屬於我。但我哋都會因為為咗彼此愛護對方而存在。你願意嗎？」
我明白以上所做一切都唔會有任何嘅法律效力，但睇住見證人真誠而且充滿期盼嘅眼神，呢種力量比起任何法律的約束更加強大！而呢一日我會永遠記住。
好多人同我講你嘅美麗同智慧，但對我來講你嘅善良先係最吸引我嘅原因。因為貫徹去做一個善良嘅人要有同自己過唔去嘅勇氣同愚蠢，而你擁有，而我仍然係學習當中。
我內心同自己默默許諾，要好好照顧同保護善良嘅你！我未必可以俾到最大嘅幸福俾你，但係我願意繼續貫徹以前對你嘅承諾：
「你以後嘅快樂由我負責！」
感謝您願意去忍受同埋接受呢個固執、橫沖直撞嘅我，同埋面對將來所有日子嘅未知數，以後日子多多指教了！
2020年9月27日，我們訂婚了！
#風雨的日子中更見真情 #老二話見唔到個樣更加詩意
