《每個BB的出生，都是一段刻骨銘心的故事》
有一件事，是我成為媽媽後才想起的事，就是問我媽當年生我時的經歷！
我媽答我：「好痛囉！夏天生你，去個廁所都成身汗！」
養兒方知父母恩，今胎懷了妹妹，將在炎夏八月生產，終於明白媽咪當年的慘況！懷Timtam仔時比較幸運，正值冬天，別人著大褸，我著風褸！每日為順產生而去行路行樓梯，懷第一胎時那種期待的心情，溫馨又甜蜜！
「點解咁痛你都可以再順產生第二個架？」我試順產失敗後好佩服媽咪生兩個都順產！
「相隔幾年唔記得架啦！有幾痛我宜家都唔記得哂！」
原來，痛楚的記憶會經歳月沖洗而忘記，我生左Timtam仔兩年後懷上妹妹，順產的痛，真的已記不起，但生產時的經歷，卻刻骨銘心！
還記得Timtam仔在我肚裡過期居留，終於等到40週+的一個早上，因為食左炸胡而留院待產。那個清晨時份，當我一起身想做個深蹲的動作，一股暖流從我下身流出，我意識到我終於穿羊水了！
因為接近41週，醫生就為我催生，等待落產房時，見到隔離床的媽媽痛到大叫，但因為只開左2度，未能落產房（開3度先可以），到醫生幫我檢查，原來我已經開左2度，但我又未感覺到劇烈的痛楚，只係似經期來的m痛，我還以為自己會是「好幸運唔太痛咁生左的媽媽」，當然呢個想法實在太天真！
因為已經穿左水，怕BB會受細菌感染，所以就算我未開夠3度，都可以落產房催生，落產房的好處係可以用各種方法去舒緩陣痛痛楚，姑娘落藥後不久，我終於嘗到陣痛的威力，真的會令人痛不欲生，陣痛本來由10分鐘一次，再5分鐘一次，再3分鐘一次，每次大約痛一分鐘左右，我拎住聞笑氣的口罩，一度懷疑究竟笑氣是否壞左，我冇得選擇，只能在陣痛來臨時狂深呼吸，或許深呼吸呢個動作分散左我的注意力，比起真正用笑氣來止痛更有效！
由於那天是星期六，我一落產房已經要求用無痛分勉，結果麻醉科醫生要6個鐘後才黎到！（後來媽媽谷有媽媽分享如果是平日，麻醉師2個鐘就到！）當我已經痛左3個鐘，每隔3分鐘就痛一次的時候，真的閃過一殺那的念頭，我會否痛死在產房內（啋！）
在麻醉師來臨前，醫生再為我睇度數，仍然是2度！咩話？我痛左咁耐一度都冇開過？
你明白那無止境痛的沮喪心情嗎？
產房的門突然打開，一個男人入黎自我介紹：「太太，我係麻醉師！」
嘩！個種感覺係尤如自己身在火海，望住個窗大叫救命冇人救，係絕望中突然消防員破門而入，「太太，我黎救你喇！」
係打無痛分勉針之前，麻醉師會講一次風險，再叫我睇睇同意書再簽字，我睇都冇睇，就簽左名！當麻醉師落藥後，背部一陣寒意，我下半身冇左痛的感覺，全身都放鬆哂，真的！就好似係地獄飛左上天堂！
不過，隨後麻醉藥令我雖然不再感到痛楚，但想痾的感覺卻隨之而來，原來媽咪話生仔好似痾屎咁係真！之後的幾個鐘，我就是徘徊在好想痾屎又唔痾得的情況下度過！
過左落藥催生12個鐘後，Timtam仔曾經心跳急跌由150下跌到5x下，爸爸事後講返我知，望住個心跳機一路跌佢都好擔心，因為陪機背住我我望唔到這些緊張的畫面，也慶幸我看不到！
醫生再為我度宮頸，開左4度！12個鐘的痛楚加絕望後，仍然只得4度！醫生鼓勵我之後數個鐘或會加快進度，但我擔心的是Timtam仔心跳急跌的情況，我跟醫生講出我的擔心，醫生再為我做了一個測試後，發現情況不太理想，最終為我做緊急開刀手術！
好可惜緊急開刀老公冇得入手術室陪產，被推去手術室的路上，我望住醫院天花板的白光燈，身體因為麻醉藥而不停抖震，我告訴自己人生中有些重要關頭總要自己獨自去面對，當了母親就要變得堅強，因為我還要保護肚裡的BB！
手術室有十幾個醫護人員在忙碌，到一切準備就緒，醫生最後檢查我的下身是否真的冇感覺，就告訴我開始進行剖腹生產！
大約過了10分鐘，我終於聽到BB的喊聲，我的眼淚隨之落下，感覺不太真實，但我真的生左喇！
當姑娘抱Timtam仔過來，我第一睇見到佢，忍不住笑：「好似爸爸呀！」
當我真正抱住Timtam仔的時候，仍然不太相信眼前這個粉團就是從我的肚裡孕育出來的！十個月的血脈相連，我們終於見面，我是你媽媽，謝謝你成為我的仔仔！
每個BB的出生，都是一段刻骨銘心的故事！兩年半後我終於的起心肝寫下這個故事，因為我將快要加入第二次的生產回憶！但願到我將來要抱孫的時候，仍然記得佢地兩個出生時的片段，一切痛楚都已經忘記，剩下的都是甜蜜又難忘的回憶！
#生仔經歷
#每一幕仍歷歷在目
#人生最勇敢的經歷
#向各位順產媽媽致敬
#食全餐又如何
#最緊要媽媽BB都平安
#好快就見到妹妹喇
#Timtam仔初生樣
