從我屋企步行1分鐘，就係一個向海既公園。我會帶金毛強散步去果度玩拋波波。
但唔知點解，有好多十幾歲，毛都未出齊既靚仔，鍾意揸老豆或者阿媽架車，一群兩三人咁，專登去我屋企附近呢個公園，坐喺個草地度食大麻。喺華盛頓州，吸食大麻係合法既，但都有年齡限制。
d靚仔成日搞到個公園烏煙瘴氣，又掉到成草地都係煙頭，非常討厭。我驚金毛強會唔小心食咗d煙頭，high埋一份，所以去襯公園都會執起d煙頭。
尋日，又有3個靚仔喺公園度食大麻。但呢3件嘢唔知點解特別乞人憎，見到我執煙頭，就專登行埋我面前掉佢地d煙頭。我火都來埋，但不動聲色。
我：Hello 小朋友，麻煩你地執返起d煙頭。唔該。
3個靚仔互望大笑，其中一個靚仔：吓！乜你唔係負責執煙頭架咩？
我：（笑得比佢地更大聲）第一，我唔係。第二，就算我係，你地都唔應該有垃圾桶唔用，隨地拋垃圾。麻煩你地執返起d煙頭。
另外一個靚仔：如果我地唔執，你可以點呢？
我：（舉起手機，極速咁連環影咗佢地既大頭公仔相）冇乜點既，打電話叫你父母去警察局保釋你地囉。
第一個靚仔：乜唔幫你執煙頭係犯法㗎咩？
我：（專等好慢咁講）唔 幫 我 執 煙 頭 一 d 都 唔 犯 法⋯
3條廢青轉身想撇，
我：（仲係慢慢咁講）但 你 地 唔 夠 秤 吸食 大 麻 就 好 犯 法⋯⋯
話口未完，3條廢青即刻轉頭執返晒d煙頭。
我一路同金毛強行返屋企，一路諗：如果我一開始就話俾佢地知，我識詠春，會唔會可以慳返d口水😆🤣😎#大麻 #唔夠秤 #廢青 #煙頭 #靚仔 #公園
