//假如我哋喺紀念日，唔能夠做到審視自己一年嘅過程，再多嘅紀念日都係冇意義。//
//唔洗花太多力氣解釋自己，人唔係為咗被了解而活。讓唔明白你嘅人花時間唔明白你，你只需要花時間明白自己，同積極地做自己。暫時冇任何解釋嘅方法比行動更加實際。//
每年生日，我都會問自己來年要做什麼。只要一年，你要決定做一件事，過程可苦可樂，但最後一定會得到一些什麼。
《20200721備忘錄》
612、721、831⋯⋯基本上每個月都有數字要記住，但係人嘅記憶，係好容易美化一啲事，又淡化一啲事。要嬲嘅事太多，情緒容量又好有限，我地其實冇自己想像得咁有智慧，可以消化到好多事，於是好多時候我哋將好多嘢放埋一邊，之後就放埋左一邊喇。
記住嘅意義係咩呢？如果我哋記嘅係一個數字，呢個數字淨係可以令我哋憤怒，冇令到我哋有任何改變，冇令到我哋有思考，呢啲就係我哋讀書嘅時候嘅死記，通常啲嘢一用到死記呢個方法，就唔係好襟記。
由上年去到而家，我見過「無忘721」嘅電話殼，扣除成本開支，所有收益捐晒去某一個機構，但係其餘五款嘅產品呢，例如係「我願榮光歸香港」啦、「香港加油」啦，就冇呢一句說明，可能你會覺得：「咁做生意都要搵錢嘅。」雖然我又覺得：「唔係樣樣野都適合攞嚟做生意嘅。」不過咁又點，如果「覺得」或者「感覺」係咁有價值嘅話，我哋今日都唔會行到呢一步吖？
我見過印咗嗰八個字嘅麻雀，我見過商人走出嚟告急，因為佢叫大陸間廠生產呢一啲商品，所以大陸嗰邊嘅生產商俾人封廠，所以而家有台灣呢一批貨可以賣到，真係好好彩，希望大家可以踴躍支持⋯⋯到底係商人好好彩？定係買家好好彩呢？唔知大陸嗰邊嘅生產商又有幾唔好彩呢？我又見過有買家好感謝呢一啲商人，咁勇敢可以將哩啲訊息，放喺麻雀上面。嗯，某程度上，我都認同呢啲行為真係好勇敢嘅，不過呢啲只係我自己嘅諗法嚟嘅啫，你根本就無辦法去改變其他人嘅諗法，唔好話改變吖，有時連理解都未做到啦。極其量只能夠將自己覺得奇怪嘅現象講出嚟，有時講完出嚟都唔知有咩用，因為睇唔過眼嘅事太多，呢啲對比起上嚟，已經算非常皮毛。
我哋成日希望身邊嘅人識得獨立思考，但係就忘記咗自己思考一下，自己到底有冇呢一個思考能力，開口埋口都淨係我覺得，有時都唔係冇價值嘅，不過更多時候嘅「我覺得」就真係講俾自己聽㗎喳。但係就算只係講俾自己聽，始終都希望可以思考清楚先講，因為我哋喺出面聽返嚟嘅嘢、睇到嘅嘢，冇營養嘅，已經太多，自己講俾自己聽嘅說話，等於自己煮俾自己食嘅晚餐，營養方面要控制得好少少。以下係經過思考之後，仍然想講俾自己聽嘅、我哩一年嘅「我覺得」：
我覺得我唔係要對所有嘢都有睇法，就算你對所有嘢都有睇法都唔代表你對所有嘢都好了解。只係想將「睇法」，放喺同自己有關嘅事上面就算，如果唔係自己想講嘅，唔係自己選擇留意嘅，真係一句說話都唔想講。
真誠係非常之重要，但係喺你對其他人真誠之前，可以自己問咗自己，對自己係咪一樣咁老實先，因為好多時間係先自己呃咗自己，再呃其他人。哩一方面大家都好拿手。
世界上冇一樣嘢俾自己珍惜嘅人嘅生命更加重要，當你意識到呢一件事嘅時候，你就會諗少好多自己，諗多好多你身邊嘅人。
唔洗花太多力氣解釋自己，人唔係為咗被了解而活。讓唔明白你嘅人花時間唔明白你，你只需要花時間明白自己，同積極地做自己。暫時冇任何解釋嘅方法比行動更加實際。
溫柔比刻薄更加難，然而，更加強大。
以上。
假如我哋喺紀念日，唔能夠做到審視自己一年嘅過程，再多嘅紀念日都係冇意義。
另外，近日三浦春馬嘅離開，令我最深切嘅體會係，要好好無視無關痛癢嘅人，更加重要嘅係，要多多正視曾經為你嘅幸福而努力過嘅人，所以，請好好正視你珍視之物！
支力會會長
薛晉寧
健吾 未敢忘記
每人都有自己嘅記憶法，好好善用腦袋啦。
香港加油 麻雀 在 ️《真Yelling - #光復麻雀》⚠️ 要開估啦 ... 的推薦與評價
《真Yelling - #光復麻雀》⚠️ 要開估啦～要開估啦～ 第1件代理的產品係#光復麻雀 真係檯上都要光復屋企擁有一副黃絲#香港加油的麻雀肯定斷藍絲而且麻雀質地係堅打 ... ... <看更多>