【講起住酒店，我最懷念係，曾經充實活過嘅證明】
出唔到去嘅時候，香港人都流行玩Staycation，但基於自己冇朋友，你去staycation嘅分別，係一個人喺屋企同一個人喺酒店，舊年去過一次真心覺得幾悶。畢竟你唔係去緊旅行，或者住間渡假酒店，一個人都有好多嘢玩、夜晚你都可以去吓夜市影夜景，香港地你仲有咩好去？當無聊極致時，有一刻諗過不如搵間酒店住下，但諗起只係轉個環境，不如罷了。
偶爾有個機會去返次酒店，又攞返種感覺，發現有一種感覺久違了。
雖然自己讀酒店出身，但始終都係個窮L，再加上都係個冇朋友嘅窮L，去旅行住酒店機會唔多（除非仲平過Hostel或者果附近冇Hostel），亦都唔想咁悶，不如住Hostel識吓人，住得最多最深刻，係當年做旅遊記者果陣。
分享過好多次，果陣我住嘅超級豪華酒店，大概係我他朝一日發咗達都未必會住，試過住到金碧輝煌成間villa大到一圈可以行五分鐘、試過喺山林間有個私人溫泉（雖然浸浸下發覺好多蚊）、試過喺園林入面有間特大房，360度都係「江南煙雨」咁包圍、試過住到泰式皇宮咁入面咩都有，你一日唔出房都唔覺悶，亦試過住到六星級酒店，可以喺間房直接遊去個大泳池，而個泳池講緊有幾層，由滑梯貫穿。
正因為你做旅遊記者要介紹間酒店，一般都會安排到最好最正嘅房型你住、個景色都一定係最好，而對方對你態度都好到無倫，唔止間房佈置到極奢華、幾支酒任你開、不斷有嘢食送入你房，最癲係喺酒店走廊遇到個維修叔叔定掃地嬸嬸，都講得出你叫咩名同你say hi，果種尊貴感覺，真係驚會被縱壞。
當然，做得呢行都知道，酒店背後應該已經開早會，你個樣已經傳閱曬全酒店所有人：拿認住呢條契弟呀！大家都已經喪屌：屌，都唔知乜水嚟，又要認住佢？喂佢個名點讀呀😂
當時做旅遊記者都分享過好多次，表面有呢啲風光嘢當然正，內裡其實好辛苦，一日可能要去廿個景點、最高紀錄一日食八餐，幾靚景色都只能趕鴨仔、幾好食都冇胃口；如果返中國出trip，得你一個男仔就要同在場六七個「老總」隊酒，講緊唔係紅酒白酒，係70度烈酒，夜晚返到酒店幾奢華都冇用，你累到抱頭就睡——唔病的話，病仲分分鐘又痾又嘔，有咩facility都未必歎到。
如是者，酒店俾我感覺並唔係歎嘅地方，而係「home away home」，有個地方俾你短時間內攤抖下——住到有個brand我會好懷念佢酒店大堂種香薰味，又會好鍾意某個brand嘅薰衣草枕頭，更鍾意某個brand可以任食佢自家品牌雪糕（唔駛開名你都應該估到）。喺最累嘅日子入面，你起身果下或會唔知自己喺邊，再加上幾乎日日都要轉地方，就係呢種「家」嘅感覺俾到我一種舒適同平安感，第二日再四圍做採訪。讀酒店果陣，成日重申酒店要俾客人一種「家」嘅感覺，讀果陣以為係太理想嘅吹水，親身感受過就明白。
如是者，我有一種習慣，每入一間酒店都會影佢間房、記錄我唔同地方嘅「家」，平時唔會影嘢食嘅我，喺酒店入面食嘢都會影相。如果住喺城市入面酒店，夜晚我都會熄曬所有燈影街景——當然如果住郊外又有大露台，我會影星空。嚟到香港，打開窗簾，你個視野唔會遠得邊度，係一個你好熟識地方，只不過由唔同嘅角度影出去，但有一刻，都拎得返以前做旅遊記者嘅感覺。
做旅遊記者唔係一件輕鬆事，到最後精神同健康不支，加埋是非鬥爭太勁就冇再做。往後，人生遇過嘅工，幾乎冇一份係正常，你問返我最懷念嘅工，點都係旅遊記者。果陣青春覺得自己有無限可能出去闖闖，辭咗職頭果幾年都冇後悔過。唔做旅遊記者，我單靠自己嘅人脈同呢個page，都一樣有咁嘅待遇，但今時今日你問返我呢個選擇有冇做錯？都會有少少後悔嘅。當興趣變成工作，你可能會累會感到乏味，但最少，都有你嘅興趣喺度，最少，你累得嚟生活係充實，而唔係單純為咗錢而行屍走肉。
前幾日同朋友講起，舊年你仲會期待幾時可以去旅行，今年大家已經冇咗呢個期待，甚至開始接受咗，呢一世都唔會再有機會去到旅行，除非移民。偶爾拎得返呢種久違嘅感覺都唔錯丫，最少係自己曾經充實活過嘅證明。
✨ 網店正式開張！新張期內貨品低至$5！請即睇：https://bit.ly/3qLPkpk
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
香港酒店私人泳池 在 港島海逸君綽酒店Staycation—房內有私人露天按摩浴池/自己 ... 的推薦與評價
... 香港 好去處# 香港 郊遊# 酒店 住宿#旅遊#日本溫泉#溫泉#露天 酒店 # 酒店 staycation # 酒店泳池 #hotel #hotelhk #hotelhongkong #北角 酒店 #親子活動#親子行山 ... ... <看更多>