《天命》和《特技人》中的譚俊彥，一個係個角色，一個係個USB Hub
《特技人》最後一周收視又有微升到22.9，全劇平均收視22.4，而女超人《延禧》收視居然升到32點，無眼睇😩隨時整個40點俾大家睇，唔敢批評嘞，連我阿媽也愛上了，女人得罪唔起，唯有恭喜恭喜，連阿Bob同肥東都分別反串扮演入面啲角色，真係勢不可擋，唯有跟風。咁嘅時勢仲講《天命》同《特技人》，這個「逆流大叔」擺明不識時務，日寫夜寫都唔多人like，真係有天理！
譚俊彥擔正的兩部電視劇，暫時收視都處於今年的榜尾位置，《特技人》全劇平均22.4，《天命》更只得21.6，這些數字顯示了這兩劇都唔多啱決定港劇生死的師奶社群口味，得師奶得收視，已經成了不可改變的事實。所以，在這大勢下，有創作班底製作出非師奶口味的作品，當然值得一些仍然希望港劇可以在題材上百花齊放的人去支持。對香港觀眾言，譚俊彥始終較為陌生，看來還需要一些時間去累積觀眾。今次差不多同時間推出兩套劇，以他的表現來說，個人覺得在《天命》中的表現較好，因為在這個雙雄對決的故事中，嘉靖帝這角色性格鮮明，劇情清楚交待在登帝位前，他受到乾隆皇帝同和珅的長期欺壓，心理已經有點不平衡，不斷設計針對和珅，除了要撥亂反正外，更充滿發洩怨恨和報復的味道，而他的弒父殺兄弟的行為，亦明確交待了中國君主獨裁制度造成的蔑視倫常、違反人性的荒謬。師奶們不喜歡這劇不是質素問題，只是口味問題，這劇本其實好有質素。
去到《特技人》的大志哥，這劇走較平淡路線(已有文章講述)，但大志哥的整體個性亦實在唔夠鮮明，除了是個菩蕯心腸的顧家好男人，再看不到有突出的個性，而且還有些不像一個角色，反而像個以功能為主USB Hub，即係一個集線器，故事透過大志哥有理冇理係人都去幫忙，將劇中所有角色串在一起，有看此劇都記得劇情不斷講大志哥幫兄弟、May豬、一哥阿媽、師母、Duncan⋯，連唔關事的津津老豆欠貴利數，佢都去幫兼且仲要自插一刀，之後又積極拉攏津津同岑大師合作搞綱購，仲有姚嘉莉間咖啡店生意唔好，佢又幫忙入股頂住，更神奇到一個成身偈油味的車房佬去學冲咖啡，除了見到大志哥過份樂於助人外，他的個人性格其實唔多突出，這角色未夠嘉靖這角色好看。
之後譚俊彥還有《包青天》和《十八年後的殺人告白》，唔知大家有冇期待，個人梗係期待《十八年》啦，大家知點解嘅。
#譚俊彥 #天命 #特技人 #收視低唔代表唔好 #宮鬥到悶仍然受歡迎無計
