講一講沖繩撞車經歷
喺沖繩嘅酒店訓緊覺，突然職員打上黎話有「CASH」。
頭腦一片混沌，夢中出現嘅六合彩號碼點都留唔住，望一望電話係上晝八點，我仲疑惑緊係咪發緊夢時，聽筒中傳來「摩斯摩時」，話俾我知我真係起咗身。「SO99Y，YOUR CAR HAS CASH。」連我擺低咗一千YEN過高速公路都知？CRASH？我一下子完全清醒咗。
撞咗？我訓緊覺都有得撞？部車租個喎，我琴晚擺低咗車匙喺櫃檯，咁入邊個數？一連串嘅問題掠過時，已經收線落樓迎接沖繩嘅陽光，同未知嘅問題。
落到去了解返件事。喺停車場全滿之下，我泊咗喺部HIACE前面，咁部HIACE要出車，職員就要揸走我部車啦。我部車前面明明就係通道，但係職員選擇褪後，想將我部車褪去HIACE嘅右邊，但係判斷錯誤，結果我部車嘅左後方同HIACE嘅右前方發生摩擦，劃痕事少，摩擦最嚴重嘅地方仲見到黑色，即係話上層油漆已經無曬，見到真皮層，無可能亦無必要向租車公司隱瞞。
租車公司喺WHATSAPP用繁體中文同我溝通，答案好簡單：「請報警處理」。我煩惱緊點同日本警員溝通時，都只可以叫酒店職員幫我報警，點知酒店方面話已經報咗，我除咗影相之外都無咩好做，既無辦法安慰一臉惶恐嘅肇事職員，亦唔想同被撞嘅HIACE租車車主傾計。再隔一陣警察黎到，抄低兩部車嘅保單、車檢紀錄，大家啲車牌資料後，我正想問下職員駛唔駛落口供，警察已經飄然遠去，HIACE車主亦都準備出發離開，留低跟唔上劇情發展嘅我。
租車公司突然已讀不回，酒店方面又話佢哋會負責，叫佢哋打俾租車公司講，係當時唯一合理選擇。突然租車公司話搞掂，淨係返去填返張FORM就得，將我心頭大石一腳車入太平洋。繼續行程到我泊車時，不期然諗起呢件事，在諗返起一個好根本嘅問題，明明有後波鏡頭，點解都會撞？
雖然兩座位開篷車比我預期更靈活，開頭泊位都用咗少少時間適應，但係都無理由會撞，只可以推斷職員唔太小心，同埋後泊鏡始終有盲點，唔係萬能。最終玩曬成個行程後，順風順水還車，職員同我講返，份尾嘅右邊上個月炒過，啱啱先整好，點知就到左邊收皮⋯⋯
#MX5真心正
#非廣告
Mazda Hong Kong
GRACE OKINAWA
car crash中文 在 2020年上半年度馬路撞擊測試(Hong Kong Car Crash Test ... 的推薦與評價
... <看更多>