【何麒的生活隨筆】
Hoki the Kongner: 旅行EDC
是咁的，當大家睇到呢篇文嘅時候，我諗我個人已經喺遙遠嘅他方喇。無錯，又係一年一度台南筆展嘅時候，咁我當然會去湊下熱鬧，順手探下朋友咁啦，所以今次我就會講吓我旅行嗰時會有啲咩喺身啦。
首先講左最貼身嘅嘢先，我嘅兩邊褲袋會有銀包、手提電話同鎖匙，呢啲就唔使講㗎喇。除此之外，我去旅行係真係會拎電筒，因為老實講唔係個個地方都好似香港咁發達，四圍都咁多街燈。有時去到某啲地方，尤其是去啲鄉郊地方，就算有街燈都會有死位，所以都係食枝電筒穩陣少少。
再黎就係個袋，今次我就拎咗個斜孭袋去台灣。我依家用緊嘅呢個帆布袋係台南廣富號出品，佢哋一向都係整開帆布產品，由代工轉型到而家自己設計自己整自己賣。我用嘅呢個袋大細幾啱用，又可以上飛機嗰時塞落櫈底，又可以斜孭，又可以手挽。不過問題在於，因為個袋只係用帆布，所以有少少重身，唔係好防水，而且條拉鍊次次都要扣番埋兩邊先拉到。
另外我就帶咗個成個長形銀包咁款證件套，方便我可以將啲護照同登機證塞哂落去，而且隔離有間隔可以擺信用卡、提款卡同埋電話卡，重有一個間隔係比我擺錢，咁樣我就可以將自己啲盤川半開兩份，一份擺銀包，一份擺係證件套。呢樣嘢就可以令我去到啲無咁安全嘅地方果陣，就算俾人偷左銀包都好，都重有本身放喺證件套嘅盤川可以用嚟備用。
之後就係尿袋，呢個唔使點講大家應該都明嫁喇。影相打卡同拍嘢，食電食到死，而部iPhone更新咗新iOS之後又食電咗，所以點都要有個尿袋先至穩陣。
當然重有水樽啦，台灣南部十月中嘅日頭都重係痴線咁熱，基本上都係喺30度左右徘徊，呢個情況之下，無水飲真係會好易中暑。雖則台灣周圍都係便利店，但係我呢種又要行展覽又要血拼嘅人就唔係成日都行得開，所以最好都係自己有枝水，咁先可以長期作戰。
最後一樣就奢侈少少，就係降噪耳機。自從我上年旅行嗰時用過之後，真係返唔到轉頭。依家我無論坐飛機定係長途車，都一定會戴耳機。但要注意嘅係，如果戴住降噪耳機嚟訓教嘅話，小心唔好瞓過龍唔記得落車。重有嘅就係，如果擔心會阻埞嘅話，記得揀啲細隻啲嘅款式，好似我咁用耳罩式嘅話就真係會阻埞，咁就會少咗位放血拼返嚟嘅戰利品。
今次講到呢度先。唔知大家去旅行嗰時又會拎啲咩野傍身呢？記得留言講吓啦。
（本欄逢周三更新。敬希讀者垂注）
---------------------------------------------------------------------
HappyKongner 招稿喇！！！
我哋嚟緊會喺逢星期五加設 「Kongner投稿區」 ，俾廣大Kongner 弟兄姊妹能夠有發表佢哋意見嘅地方，亦都可以鼓勵大家多啲運用自己嘅闡述能力。
有興趣嘅朋友歡迎直接Facebook Send Message 俾我哋，又或者Email 去 happykongner@gmail.com 同我哋傾都得。
期待收到大家嘅鴻文大作！
納稿標準：合乎邏輯，文句通順，言之成理即可，不過編輯部同事比較嚴謹，大家自己小心。
edc信用卡 在 硬體安裝教學: EDC 刷卡機控制盒安裝教學 - YouTube 的推薦與評價
Your browser can't play this video. Learn more. Switch camera. ... <看更多>