//支持本Page請Click入內文比Clap，已為Medium收費會員請直接Click入內文閱讀，謝謝！//
以罷食藍店、「懲罰」黃店嘅黃金經濟圈愈來愈成勢，陸陸續續有食店例如華星冰室、佳景集團同藍絲KOL割席以避免遭受「裝修」之災，甚至乎轉軚積極作出支持抗爭嘅措施，例如張貼標語於餐廳、提供「學生餐」，榮熙茶餐廳甚至公告任何員工若在工作時間談論政治、發表藍色言論即炒，老實講，都幾出乎我意料之外。
要知道香港人一樣都係鍾意貪著數、懶惰，過往最鍾意嘲笑大陸人其中一樣嘢就係罷買日貨，永遠口裡說不，身體卻很誠實。但如今竟然係可以萬眾一心到一個地步係，我身邊有從來對政治冷感嘅朋友，竟然真係堅持罷搭港鐵到而家；甚至好多香港人食飯而家都講到明非黃店不食，搞到出名黃店係逆市排哂長龍。
呢股潮流其實好多地方值得分析，例如文宣組點樣透過「懲罰」黃店帶出一個又一個感人小故事；又或者將「懲罰」黃店包裝成一樣好有品味、好有型嘅消費行為，相反幫襯藍店就是七。甚至乎社會抗爭點樣同消費結合，借助群眾壓力推動大家──「既然唔敢衝至少都要做好份內事」呢種諗法，令最溫和嘅黃絲寧願忍受少少唔方便同埋口福，都要貫徹罷食罷買嘅原則。
不過著名社運份子龐一鳴同經濟系教授曾國平呢兩位一左一右代表，都先後撰文對於呢個黃金經濟圈效益表示質疑：龐一鳴話根據歐美罷食經驗，好多時罷食運動經歷一定時間後就會出現反彈，因為當消費者以「家長、情人、朋友」等等身份來進行購買活動，就會抵消咗罷買罷食嘅決心；同埋要評估罷食有無效一定要有數據支持云云。
至於曾國平則認為，當查證政治取向極之困難，而扮黃成本又極低（反而藍得太出位會招致「裝修」、罷食），結果係會鼓勵大量小店扮黃，而消費者可能不知就裡、糊里糊塗就幫襯咗，令其成功成為Free Rider。
即係呢兩種講法我都唔可以話錯，至少比起之前自稱「保險小薯」講唔知乜9嘢「裝修美心保險係包哂，結果益埋佢有全新裝修」（保險理賠嘅代價係下年度保費激增甚至拒絕再受保，何妖議員辦事處就係例子）、又或者有左膠同連登仔話「亂咁裝修店舖係會失民心，我地應該為抗爭設限」（根本前線係有足夠智慧修正裝修錯誤，唔駛你班冷氣軍師指指點點）相比係高質得多。
但正正係如龐一鳴所言，罷食嘅勢頭係好難維持，因為參與嘅門檻低、放棄嘅門檻亦同樣低，所以係更加肯定「裝修」策略嘅需要。正如我之前一而再、再而三提出嘅抗爭方程式：
人數Ｘ程度＝抗爭衝擊力
就算成千上萬位消費者罷食，除咗睇大集團嘅財務年報或者記者專訪，你係好難知道究竟成功咗幾多，甚至乎龐一鳴嘅所謂數據，例如中銀第三季度流失咗三百幾億存款聽落好似好誇張，但其實根本就係九牛一毛對中銀業績毫不動搖。
但係「裝修」卻係即時睇倒效果：維修費用（或者係保險成本嘅增加）、視覺上嘅震撼性；對黃絲響士氣上嘅鼓舞同警惕（記住場抗爭未完、要對死去嘅義士有所交待）、對藍絲嘅威嚇同震懾力（同抗爭者為敵後果自負）……所以點解我對反對或者刻意淡化「裝修」嘅左膠和理非嗤之以鼻，係因為佢地根本睇唔出「和勇合一」嘅真正意義：和理非雖然容易造成掀起風潮，但勇武卻係維持衝擊力嘅矛頭，兩者缺一不可。龐一鳴只談罷食而不談裝修，評論當然就會有所缺失。
至於所謂「扮黃」問題，我地首先要問嘅一個問題係，究竟「扮黃」成本係咪真係低到近乎零呢？從你睇龍門冰室比人唔至一次搗亂，似乎又唔係完全零風險，甚至乎亦有唔止一間餐廳表示曾經比藍絲騷擾過；換言之黃店都唔係完全著數哂。
但另一方面，以目前民意調查黎計，起碼有七成人係支持抗爭者，相比起黎撐警嘅只有三成；而無論係網上定現實世界，黃色經濟圈都要比藍絲擁有更大嘅罷食同撐黃店嘅行動力，換言之藍絲未必介意去黃店食，但黃絲卻係好介意去藍店食，所以埋單計數，你做黃店點都著數個藍店，「扮黃」嘅誘因始終存在。
而家個問題卻係，當有愈來愈多店舖聲稱自己係黃店，然後就有人質疑呢埋店舖只係為咗拯救自己生意而「扮黃」，甚至原本係藍店靜雞雞轉黃混水摸魚，於是又出現咗兩種意見：
1. 有人認為唔能夠將黃店標準set得太高，高到大多數店舖都追唔上，咁樣只係會令黃色經濟圈難以壯大；而郁啲就質疑店主做得唔足就叫人地「偽黃」，亦會令成場抗爭劃地為牢、小圈子同排斥中間派；
2. 亦有人擔心將黃店門檻Set得太低，唔單止對一啲忠實撐抗爭嘅深黃店唔公平，太多混水摸魚之徒變身「偽黃店」，亦會令「真黃店」客源被分薄；更重要嘅係，如果咁易比人「白轉黃」或者「藍轉黃」，咁係咪變相鼓勵呢堆牆頭草，一到民意逆轉就同抗爭運動劃清界線。
個人認為，其實兩種講法，並唔係完全矛盾對立。企響黃色經濟圈角度黎講，有人願意加入成為黃店，理應係無任歡迎；同時如果因為有舖頭曾經係藍而永世都唔願意比機會佢轉黃，不近人情之餘亦等同將願意投降嘅敵人永遠推向對立面，點都講唔過。
至於Free Rider同埋公平問題，反而應該係引入新分級制度，去區別唔同黃店對抗爭嘅支持程度──死忠撐抗爭嘅「深黃店」應該要最大嘅支持同宣傳；只係做啲初階門面嘢、又或者啱啱又藍轉黃嘅，就應該加上「淺黃店」標籤比大家作善意觀察，而唔係拒人於千里之外。
要記住黃色經濟圈雖然係一種情感消費，但同時始終係一種經濟行為：即使同時支持抗爭，無論係食物水準定係支援嘅抗入程度，都應該依市場機制自由競爭，然後由消費者決定邊個可以生存落去。所以，與其敵視想加入黃色經濟圈嘅新成員，倒不如諗下點設立一個評級機制，同埋將各黃店嘅唔同資訊廣傳開去仲好，而唔係得一個簡單嘅名單。
