https://www.patreon.com/posts/48185419
當日我誓死反對，勸阻別人初選，所以今晚我訓得著；但你班話唔玩初選就係鬼嘅黃標KOL呢？
參加初選47人被告顛覆政權罪，我其實係充滿同情：任何被政治迫害而身陷囹圄都係一件慘事，二來入面更加有唔少係揹緊暴動罪、有份參與抗爭嘅義士；三來何況唇亡齒寒，今日拉完佢地，都唔知會唔會有一日終於輪到我。
之但係對於有啲當日反對初選嘅人對呢個結果拋低幾句冷言冷語，我卻係絕對能夠體會佢地嘅心情──你班善忘黃屍而家梗係唔記得，但作為少數反對初選嘅一份子，絕對記得當日我地點樣講到35+唔Work，唔參選初選嘅候選人唔代表唔支持民主，然後就比你班黃屍飯狗圍剿，一時又話邊個唔支持初選名單候選人就係鎅票撚，一時又話邊個反對飯民初選制度就係收共產黨錢嘅分化撚……
結果呢？35+證實咗只係惡夢一場，有同無參加初選嘅人，個分別就只係在於會唔會因此而坐監：當日如果有候選人聽咗我或者其他人嘅建議無參加初選，因而避過一劫，我唔會走去邀功而只會覺得佢好彩（因為我反對原因並不在於怕佢被拉），但如果當日有候選人原先唔諗住參加初選，但因為你班黃屍飯粉不停動用群眾同輿論壓力走黎逼宮之下，唔情唔願走去參加初選，最終面臨以年計嘅牢獄之災，咁又點計呢？
最好嘅例子就係黃碧雲。由一開始佢就唔願意參加初選，佢反對攬炒、反對勇武抗爭、一直都只希望用過往嘅協調方式呃多屆議席，點知最尾就響群情洶湧之下被夾上初選35+呢架戰車，而家車毀人亡前途未卜，仲見有唔少黃屍暗諷乜都唔關佢事竟然都比人告──喂，我當日反對初選，當然有資格話佢行差踏錯，但黃屍有份迫佢上馬去選架喎，而家佢無辜奶嘢，你班撚樣會唔會有絲毫內疚之心？
我自己從來唔會呼籲任何人去做勇武抗爭，因為我自己唔敢/唔會公開去做嘅嘢，亦都唔會叫人做。我所批判嘅，係果班當有人為香港社會犧牲，然後仲要響後面指指點點話「畫面唔靚」兼拖後腿、連最基本落街響安全地方聲援都唔會做嘅冷氣捉鬼天屍、同埋口講自己幾咁愛香港，但卻係借助抗爭大吸課金中飽私囊嘅黃標KOL。每當我遇倒前線義士，有機會時我都用盡我嘅方法提醒佢地危險之處同埋各種後果。
但記得當日本民前等勇武派崛起，黃屍最鍾意掛響口邊一句就係：「叫人衝自己又唔衝正人渣」，咁果陣初選叫人去參加，甚至迫人去參加嘅呢班黃標KOL，有無用番同樣標準去檢視番自己呢？戴耀廷主催初選35+，而佢亦以身作則作為主辦人「以身作則」被捕，但叫人去選果班黃標KOL呢？有如XXXX立刻割席置身事外；有如劉細良、燒山之流身處海外安全地方最多貓哭老鼠幾句呃下深黃傻尻課金，繼續個個月收近百萬風流快活；
不過最撚仆街果個叫沈旭暉。35+奪權計劃最初就係由你構思出黎，到而家出事，你卻竟然可以扮哂同自己無關：喂你係無參與飯民初選任何討論，但你作為35+精神領袖、提倡功能組別過半選出深黃特首去到而家竟然提都唔提，將個責任推哂比戴妖？而家告嘅一眾人等竟然無你主謀個名，咁我只能好陰謀論去判斷，你當日搞個35+出黎，就係幫你契爺葉國華向共慘黨領功，將飯民引蛇出洞一網打盡。
當日我因緣際會，響Myradio先後遇到幾個初選參與者，因為佢地都係前線義士，所以我同台長都先後苦口婆心勸佢地唔好參加初選，但當佢地因為唔同意去意已決（當中有人承認係因為被大台夾住局選，廢事比人話係鬼），我都會尊重佢地嘅決定。無錯，而家拉人果個係共慘黨，罪魁禍首一定係佢；所有參加初選被捕嘅全部都係Victim，但至少當日我有盡力有公開勸過佢地唔好參加初選，至少今晚良心唔會有愧訓得著。
然而你班黃標KOL，人地當日聽你老點／被你脅逼參加初選坐監，卻可以無穿無爛繼續呃尻班蠢撚黃屍你地係民主英雄，大收課金、Youtube廣告、賣呢賣路大食人血饅頭，我而家就問你班撚樣累人一世今晚訓唔訓得著？我相信多數都訓得著，因為呢班黃標KOL眼中只有錢，良心一早比狗擔咗。
