【當你成功杯葛到戲院，結局又係咪咁簡單？】
如果大家仲記得，我喺戲院開返冇耐分享過，好多人話因為戲院跪低，同政府一齊「安心」所以要杯葛，甚至因為見我入返戲院，覺得我唔同香港人同步、大家唔齊心杯葛，激發起Unlike潮，更有人話要杯葛到戲院跪低執笠云云... 當日我都話，戲院都要交租，識得行內人都知道，零收入不斷喺大商場交租，食政府果少少補貼，頂到幾耐？大家矛頭應該係指向政府而唔係blame the victim，仲有人話我擺明幫政府講好說話，佢就決心唔會再入戲院喇，講到言之鑿鑿好似自己簽埋合約咁。
然後，真係俾你杯葛到執笠喇，又一齊出嚟傷春悲秋懷緬過去；當日話戲院已成歷史，仲堅持入戲院係你古老石山，依家又話好懷念喺UA沙田排隊嘅日子、點解連同CineTimes告別機會都冇。
一夜之間，出現咗好多文章，係電影行業寫嘅又有、係其他唔關事純粹抽下水嘅媒體又有，好多人指出一個問題就係，UA執笠，唔單止係一個集體回憶冇咗、跌入歷史洪流，更多嘅係連鎖效應，影響埋其他商場嘅生計－－如果大家仲記得，當日《阿凡達》落畫後，ISQUARE商戶影響有幾大，到重映嘅反應又幾興奮，甚至大家都陰謀論咁講，最終大量中資入嚟；戲院或者未必會消失，但就變成咗更徹底大陸化，繼而你真係要用貓眼買飛，再由英X不了、黃X鳴不了，變咗你真真正正全香港戲院都不了。
UA倒下，又有更多相關小道消息，話下一個係百老匯，因為交唔到裝修費又放埋The One，又可能係嘉禾，因為已睇到佢股價唔掂，又傳出售七間戲院經營權，搞到個個都要出嚟澄清冇咁嘅事。無論如何，可能我哋都已經唔會相信有咩係永恆，正如一星期前有人同你講UA會突然全線結業，你都笑人陰謀論啦。
諗返不足兩年前，戲院不斷開完一間又一間，甚至聲稱要打造「區區有戲院」，熱鬧到好似寫下戲院新一頁；為咗吸引觀眾入場，各間戲院引入好多唔同格式，營造完美戲院體驗，同時都引入更多周邊嘢，你可以一路睇戲一路食高級晚餐，又可以包間戲院搞唔同活動。
就係不足兩年前，你以為戲院發展會進入新時代，一套《復仇者聯盟4：終局之戰》一套《阿拉丁》一套《反斗奇兵4》一套《獅子王》一套《蜘蛛俠：決戰千里》，票房節節上升，都唔係你話即場買飛就買到，甚至大家通宵去戲院排隊，曾幾何時，戲院都係我哋生活一部份，點解會極速變成咁樣，繼續杯葛，繼而做唔住？
我哋呢兩年習慣咗無常，經營呢個Page今年到第13年，成日話冇人睇，寫嚟零收入，仲日日俾人鬧。話要執Page執Page，但一直都執唔到，就係放唔低呢個興趣。過去一年就算冇乜得入戲院，都盡量不斷搵各類相關文章同新聞寫，出Post量同正常時間分別唔大，但原來去到一個地步，你開始睇唔到將來，係會恐怖。
以前識落嘅電影公司PR、記者，同你講唔做喇，send封「Goodbye & Thank You」信出嚟，你會一笑置之，再問佢：「點呀又轉去邊間呀？」「Good咩Bye丫，轉頭又第度見返你啦！」近排幾乎個個星期都收到呢類email，大家已經唔再轉去第間公司，甚至，唔再從事娛樂呢一行。雖然話，有啲關係有心keep，唔理轉去邊都會keep到，之但係聽到大家好似逃亡潮咁，都有少少唏噓。
可能大家口響響話要杯葛、要打倒戲院，當有朝一日，真係俾你成功咗，甚至因此「引清兵入關」，一切背後可能都變成萬達院線時，又係咪你想睇到嘅現象？
圖為UA黃埔最後一夜時影，相關文章可看留言連結。
‼️電影網店全新貨品已上架，低至$5起，快啲嚟搶購啦：https://bit.ly/3qLPkpk
【Patreon加強版】尊享優惠、更多深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy
或使用Payme link：https://payme.hsbc/jackyhei
或透過Paypal捐款：paypal.me/jackyhei
【MeWe請Follow】mewe.com/p/travelerwithmovie
【IG請follow】www.instagram.com/travelerwithmovie
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
