對唔住
本身想大家開心
但搞到咁多人唔開心
本來38場一出就爆哂
我應該好開心至係
但我冇
唔係因為我俾人鬧
而係因為我知道有好多人排咗幾個鐘頭隊但最後買唔到飛
之前有個記者問我個舞台劇有啲乜嘢message
我話message都係其次
最重要都係希望入場嘅觀眾可以重拾開心嘅感覺
而家諗返起真係諷刺
因為未開show
已經搞到大家唔開心
我想有少少解釋
你可以當我係掩飾
亦都可以當我係分享多啲背後嘢畀你哋知
等你哋知道之後
希望可以冇咁唔開心
1）「係咪留起晒啲飛？」
我敢講
全香港搞show當中
放得最多飛俾公眾賣嘅人
我都算數一數二
你平時去買飛
往往見到一片黑海
人哋留起五成、七成、甚至八成去內部認購、畀贊助商
我呢？
有跟開我嗰啲癲喪仔一定知道
我調返轉有八成都公開賣
好似今次咁
我啱啱問咗監製
我哋只係留咗1%飛俾嘉賓
大概10%俾工作人員同埋我嘅同事內部認購（只限他們的朋友）
亦即係我哋攞咗差唔多九成飛出去俾公眾賣
講咁多
只係想你哋唔好誤會我收埋晒啲飛
2）「點解唔再加場？」
所有場地至少一至兩年前要book，唔可以突然話加就加。
3）「點解唔一早book耐啲？」
首先，你望吓我。
你望吓我先。
你哋真係以為我係明星呀？
定係你以為東方昇真係好紅？
由我哋開始賣
到爆晒38場
冇一個媒體會報導的
W都好有叫座力
白只阿卵等等嘅舞台劇演員當然都好有叫座力
但始終都唔係真係好明星嗰隻明星
38場演藝學院
已經係好唔尋常咁多場
已經係接近4場紅館嘅規模
已經係因為我一早以為會搵一個明星孭飛嘅場數
已經係破晒100毛同W過往嘅所有紀錄
我哋自己知自己事
一早淨係諗住開15場
見預售反應好先敢加到38場
得你地睇起我哋我好感激
但呢種大型舞台劇
製作費要八位數
係八位數
唔係話book就book亂咁book
瘋狂book完
賣唔晒係會蝕大本的
4）「排到我先冇飛呀！」
我最唔開心嘅
係有人排咗好耐隊之後買唔到飛
甚至有啲係因為系統問題
而累到佢買唔到飛
但我真係真係好想講
千祈千祈唔好怪個系統
個系統雖然仲有好多小缺點
但已經係坊間售票系統之中
比較人性化嘅一個
排隊係排得耐啲
但起碼知道自己排到去邊
由幾個月開始監製小龍已經幫手四出搞呢個系統
幫手搞呢個系統嘅朋友亦都非常非常幫手
千祈千祈唔可以怪票務部嘅同事
喺監製嘅領導底下
佢哋亦都係非常非常人性化嘅一班有heart的工作人員
如果你今日真係遇到啲非常不幸嘅遭遇
假設你仲有證據提供
佢哋亦都會喺能力範圍之內幫你解決問題
5）「下次可唔可以搞得好啲？」
對唔住
我真係未諗到一個方法
可以令大家都開開心心
我已經發明咗「一年前預售」
「突擊一星期前賣飛」
「乜都唔知預售」
所有所有呢啲方法
都係為咗支持我嘅人
可以喺毫無壓力嘅情況底下
好容易咁買到飛
但我明白
需要有日期時間地點內容先決定到買飛嘅人
其實係非常正常
非常合理
亦都唔代表咁就係唔支持我
但我真係要再諗下
點樣先可以再做得好啲
（總結）
唔好意思排完一日戲返到屋企有啲攰
講嘢都有啲語無倫次
明明係為咗等大家唔好唔開心
但講講吓都係變咗維護返我哋自己
只能夠再講兩個結語：
A）唔好買黃牛
B）可以send email去排waiting list，真係仲有兩個機會：
第一，有嘉賓或者工作人員嘅朋友唔得閒，我哋就會多咗飛出嚟
第二，如果場地放寬疫情下入場限制，就有再多10,000多飛放出嚟。
