［深夜文］
今晚可以近距離見到我一直好喜歡既船梨精ふなっしー，其實內心係好激動，好想打埋出黎先訓覺。
我並唔係第一次親眼見到佢，我曾經天寒地凍拉左個同事陪我一齊去千葉既牧場，搭三個鐘車，排個幾兩個鍾去遠距離見佢一面，佢出場15分鐘左右。
好多人覺得佢嘈，覺得佢唔靚唔得意，配色醜怪。我明呀，當初好多人都咁覺得。
熊本熊天生出黎就好得意，雖然佢都曾經寂寂無名，係海報上被介紹為「有隻叫熊本熊的吉祥物」。但有成個縣政府係後面幫手，佢又好努力咁宣傳自己，上唔同節目做宣傳下有今日成就，當然我亦都好鍾意同欣賞佢。
但船梨精呢？當初佢係被一個普通市民設計出黎，佢想成為船橋市公認既吉祥物，但結果d人趕佢走。
佢一個人拍片（我承認當初睇真係唔知佢做緊乜），冇被邀請下自己走去人地event「幫手」，好多人會笑佢又覺得佢搞事好麻煩，但佢捱過左。
知唔知點解佢會講野？就係因為一開頭得佢一個，冇人帶住，直到去到event，人地問佢問題，佢先硬住頭皮自己答。
佢唔係第一隻會講野既地方吉祥物，係佢前面仲有兵庫既ちっちゃいおっさん。但我好欣賞佢答既野，除左風趣幽默，好多設定上既野都唔係亂答而係有清楚咁考慮過，甚至沿用至今（當然都有d野係唔最周全，之後有少少商業因素下改左/唔再用）。
睇佢上電視比節目主持人掟去枱角，睇佢比整人節目差d炸成梨撻，睇佢夢想成真同喜歡既結他手同台演出，睇佢紅出海外，睇佢有自己既卡通⋯
當時係日本既我好消沉，睇唔到前路，唔明白人生到底有咩等緊自己。但望住佢，知佢辛苦但有回報，我覺得人生なんとかなる、きっと乗り越える。應該是無絕路的。
至今佢仍然冇被船橋市公認為官方吉祥物，佢亦都講左「唔洗被公認都好既，可以亂咁黎。」。但佢既出現同努力，的確令更多人認識千葉縣船橋市。
而我，作為曾經被佢心靈上支撐過既人，我一直好想親口多謝佢，我成功左，ありがとうふなっしー。
★另外多謝唔認識我但知道為我影左張世紀合照後，特登send返俾我既靚女！感謝感激梨汁プシャー！
