在香港時嘅偽中產日子與在英國的真生活 (4)
離開香港，去英國重新生活。之前都有提及原因同理由，大部份都係我同老婆兩公婆嘅決定。好多人到今時今日都會問一啲有關移民又好古老嘅問題同意見，「其實英國有無歧視？」、「個女番學有無比人蝦？」、「英國好有階級觀念喎，中國人好難上位㗎！」、「你去外國做二等公民呀？」，等等...
可能我以前响英國讀書，以上嘅問上响我決定番英國嘅時候，一啲都無考慮過！原因唔係我完全否定上面嘅問題同諗法，只係香港人對自己嘅自我觀感同英國人嘅習慣好唔同。
歧視問題，其實大家心裡面問下自己，有無試過响香港對唔同種族嘅人有無試過唔認同？老實講，包括我在內，我幾肯定每個人都會有。唔好講唔同種族，就算同文同種嘅香港人都會因為生活習慣唔同，而唔認同其它人。厘啲唔係叫歧視，只係當大家係一個香港人（尤其是中國人），自己嘅作風同其它人唔同，其它人唔認同你，加上自我觀感差，所以先會覺得人地歧視你。而小朋友就更加唔會有厘個觀念！
另外，去得外國生活，我又唔係好明點解唔了解下人地國家嘅文化同生活習慣，去融入個社會。我相信厘個係必需嘅，因為香港人都算係國際人，去融合英國社會其實唔難。你估重係百幾年前，英文都唔識，賣豬仔過黎一定要黐住個唐人街咩？
咁如果有啲種族，尊門响外國做啲好離譜嘅行為，咁就真係唔好怪人歧視自己！所以，每次有比較年長嘅親友黎英國，或者初黎英國讀書嘅年青親戚，我都會語重心長咁講，作為香港人到外國，一定要自重，要比人知大家有教養嘅人。好簡單一個例子，我本人就好討厭香港人去到外國旅行，無論乜嘢場合都一班人大大聲講嘢，我諗大家去日本呀，歐洲呀見唔小。試問大家如果有一班人响你旁邊不停大聲咁講一埋你唔識嘅語言，你感覺會點？有品嘅就望幾下，甚至出聲叫停，咁唔通係歧視？
另外，香港人其實真係好鐘意挑剔其它人嘅語言accent，啲所謂高學歷，偽中產尤甚。老實講，厘個都係自我形象嘅問題，難聽啲講係奴才性格，亦代表世界觀窄。其實，英語世界，有幾多種口音香港人知唔知呢，剩係英國本土白人都大分幾種啦，唔好講細分。我本人覺得，有口音咪有口音囉，唔係mother tongue就多數有口音，只要唔係讀錯字，有乜問題？我從來都唔感覺到，因為口音，英國人會歧視自己。
至於階級觀念，我重覺得好笑。厘個真係香港人近幾十年受咗美國文化影響嘅怪思考模式。人地美國人，真係相信獨立自由，所以可以小啲階級觀念。但係香港人真係學到咩？咁點解上堂有老師講無學生講呢？點解仔女到讀大學都要聽父母話讀乜呢？點解啲中產同老細開會唔敢話老細錯呢？有幾多老板夠膽趕客呢？同我好肯定咁話比大家聽，英國無錯係好有階級觀念。但係階級根本就係資本主義社會嘅殘酷現實同副產品，如果唔鐘意就只好擁護馬克思主義。可能我真係受英國教育長大，亦做咗幾十年人，我個人的確相信生活响厘個世界，總會係有人可以比氣自己受係唔需要原因嘅。最簡單嘅係父母，外父外母，老細，客人。唔想受咁多氣咪自己努力啲囉，但係細細個了解咗個社會模式，出到社會就無咁容易有錯敗感。
話我去英國做二等公民嘅人就最可悲哀，我通常我都會好唔客氣咁答，乜响香港就係一等咩？回歸前係英國嘅殖民地公民，回歸後係中國嘅特區市民，即係以前唔係英國公民，依家唔係中國公民。但是我就係正正式式嘅英國公民，而我老婆同個女將來都會係。
總之，我黎咗英國，歧視或者被稱為二等公民就多數唔係來自英國人，反而係中國人。同時，我架車壞咗，有陌生人專登停車用成個鐘幫我就試過兩次，唔幾得帶散紙或者銀包，店員同老板叫我遲啲比都試過幾次。厘啲就係住郊外Town仔嘅人情味。
#人地歧視你還是自己歧視自己 #英國階級觀念 #自重啲人地咪專重你 #究竟邊個係二等公民 #讀nursery點歧視呀
