關於 自嘉製涼粉係非常之不切實際 ，我們在網路上蒐集到這些相關的討論、資訊與評價

涼粉（下）

真係大家咁熟先至講，涼粉製作呢家嘢，都應該唔會做第二次！因為真係好辛苦好辛苦好辛苦！其實我之前有焗過麵包、又搞過好多同煮飯有關嘅嘢，程序好多同好繁複下嘅都玩過，但係就真係冇整涼粉咁辛苦！

首先講個購買過程，真係唔係邊度都有涼粉草賣，行餐飽！

之後係個製作過程，嗰啲涼粉草其實係柴咁款嘅，你洗嘅時候真係會拮到隻手損曬，之後卒佢又淥親，冇錯我係淥熟咗隻手咁滯嘅！蠢到死，唔記得咗可以搵啲凍水座住個煲嚟捽，咁就淥親啦！

另外捽嘅時候亦都係會擦損手皮，我隻手其實用得好粗，但係都擦損咗！

之後到隔渣，呢個先至係辛苦之中嘅辛苦，我又係蠢咗唔用魚袋，其實倒入魚袋一扭就搞掂，我懶係仔細咁，攞個紗網慢慢刮，真係搞到天光！都未計滾瀉咗抹灶頭嗰個辛苦法！

終於，製作完成，但係都係得果咁嘅兩三碗！真係非常之唔合乎經濟效益！

未完！仲有清洗過程，佢唯一好處係唔肥，好易洗，但係佢嗰啲涼粉草碎真係無孔不入，而捽涼粉草嘅過程又會唧到成個廚房都係涼粉草嘅膠質，似去釣墨魚咁隨時會俾啲墨射親你，又好似案發現場咁明明抹完抹淨，又突然發覺好似仲有啲痕跡喎，又要繼續抹，真係好佩服嗰啲殺手，殺完人之後點樣清理現場呢，應該一槍爆埋去，啲血會唧到周圍都係喎！

製成品可算十分成功，確實係好乾淨，亦都有外面買嘅嗰種彈牙。咁會唔會繼續整呢，應該唔會，除非會！依家屋企仲有80g涼粉草，你邊個要就PM我啦！

#何嘉麗callmegaga #何嘉麗 #為食路上
#自嘉製 #涼粉 #冰凍涼粉 #冰凍雪糕涼粉
#街邊涼粉擔心唔合衛生
#罐頭涼粉好多都加咗糖
#涼粉粉都加咗糖
#呃like之作 #不可一不可再
#自嘉製涼粉係非常之不切實際
#自嘉製涼粉浪費時間但係衛生
#自嘉製涼粉可一不可再

涼粉（中）

雖然萬眾期待睇下集，但係我假假地都要教下你點樣整涼粉先，所以而家先嚟中集。

返到屋企照住網上資料製作。將涼粉草80g剪碎然後用清水浸洗，要過多幾次嘅，因為佢都有好多雜質。另外預備1L清水，再加入5g嘅梳打粉，梳打粉同水攪拌好之後，就同洗好嘅涼粉草一齊倒入個煲。之後就由得佢係咁煲，煲一個鐘頭。記得放隻碟入去，因為化學作用，呢㷛嘢係滾到滾到滾到好高好高好高嘅！搵隻碟壓一壓冇咁驚，簡稱壓驚（有啲爛😆）！

一個鐘頭之後，將啲涼粉草隔開，然後量度一下水嘅份量，唔夠加到夠，總之要有返1L水為止。當加水嘅時候最好加凍水或者冰，因為跟住係要用手去捽嗰啲涼粉草，等佢啲膠質再出得嚟多啲添。咁如果啲水好熱，咪會淥親自己囉！

捽完之後又隔水，我用紗網隔水，你亦都可以用魚袋，真係要隔得非常仔細，因為佢有好多枝枝葉葉。隔清晒啲水之後，應該都係有1000毫升左右，咁就攞少少涼粉水出嚟，然後加入30g鷹粟粉，先攪勻然後再將呢啲鷹粟粉水慢慢倒返入果煲涼粉水入面，一路倒一路搞，搞到均勻晒之後，再煲返滾佢就完成。煲嘅時候都係要一路搞一路搞一路搞，唔係佢會癡底！

離爐之後就倒落個盆嗰度，攤凍咗就可以放入雪櫃，雪到夠凍就食得。

#何嘉麗callmegaga #何嘉麗 #為食路上
#自嘉製 #涼粉 #冰凍涼粉 #冰凍雪糕涼粉
#街邊涼粉擔心唔合衛生
#自嘉製涼粉係非常之不切實際
#自嘉製涼粉浪費時間但係衛生

涼粉（上）

我對涼粉係有一種情意結嘅，因為細個屋企係唔俾食涼粉，覺得佢唔衛生，但係又時時喺屋企後街，見到個阿伯推住架鐵車，上面有一舊冰，再上面係一舊好大舊嘅涼粉，再再上面鋪咗一個麻包袋喺度叫賣，佢日日係咁買，但係我哋一直都係唔准食！

我諗我第一碗涼粉應該係喺港台做嘢嘅時候！因為實在太根深蒂固，覺得涼粉冇益，食完之後會肚痛！但係食過一碗之後，就控制唔到啦，因為嗰種口感好過癮。所以我係好鍾意食涼粉嘅。

一直以為，涼粉係煲一啲中國藥材，然後好似啫喱咁加啲大菜或者魚膠粉而成。點知，原來涼粉草係天生膠質，只要煲嘅時間足夠，同埋用梳打粉或者鹼水令佢產生化學作用，啲膠質就會走出嚟。

真係學到嘢！

於是我走去買涼粉草，原來咁難買喎！就算係一啲賣藥材嘅舖頭都未必有，終於真係行咗冇10間都有8間藥材舖，俾我搵到嘞。我買咗4両，佢收我$24 ，隱隱然又覺得有直升機喺頭上飛動！伏伏伏伏！唔緊要啦，第一次嘗試，俾人搵吓笨都應該嘅！

滿心歡喜帶着包涼粉草返屋企，諗住煮人生嘅第一轉涼粉，點知更大嘅伏原來喺後面。（待續）

#何嘉麗callmegaga #何嘉麗 #為食路上
#自嘉製 #涼粉 #冰凍涼粉 #冰凍雪糕涼粉
#街邊涼粉擔心唔合衛生
#自嘉製涼粉係非常之不切實際
#自嘉製涼粉浪費時間但係衛生