讀者投稿《豬隊友助攻奶奶篇》
一直知道C6孝順，但生左BB之後就更媽寶。講下背景先，我同6299唔係同住，我搵錢同佢個仔一樣咁多，經濟非常獨立，無靠過佢地。生bb之前大家相敬如賓，生bb後因為由我阿媽湊，佢地覺得女家霸住個孫，而且對我湊bb的方式諸多意見，令我好反感，於是佢地同C6講話BB跟佢地姓，叫C6唔洗聽老婆話，佢地係爺爺嫲嫲鍾意點就點，「主權」係佢地度（佢地係大陸人，好鍾意講「主權」呢個詞）。結果有一次爆煲差d同佢地反面，兩老喊住咁話唔想無左個仔同孫呀，又話其實當我半邊女咁錫等等⋯⋯。以下分享一下佢地點樣當我「半邊女」及C6的豬隊友行為，睇下大家有無共鳴：
1. 拍拖時請佢地去旅行（雖然未結婚但我都識做），去到某景點要搭𨋢，佢地一家人入曬部𨋢，剩低我入唔到，C6話：妳自己搭下一部𨋢啦。（個度人生路不熟，當時自己一個企係度真心驚）
2. 結婚後曾經同住半年（俾足家用），62明知我食唔到太鹹，都唔會就下，仲話「呢碟唔啱食咪食第二碟囉」。佢地食慣鹹同油膩，無一碟餸我食到，結果我食左半年白飯，佢地無理過我。
3. 買左樓（全部自己俾錢），C6主動呈獻鎖匙，完全無同我傾過。
4. 如果同枱食飯有雞，99第一時間夾一隻雞脾俾C6先，跟住另一隻脾就夾俾女婿，雞翼俾姑奶，全部雞胸就夾俾我。枱上面邊碟餸無人食就狂夾個碟俾我（因為62有時煮野真係好難啃）。十幾年來都係咁，最近我反擊，佢夾雞胸俾我時，我會夾番俾C6，話「咁大舊我食唔曬」。跟住佢無再夾俾我。
5. 我個B未夠兩歲，C6話要帶佢番大陸鄉下，因為62想俾鄉親父老見下個男孫。我反對，因為大陸實在太多菌，食物又唔安全，我話如果bb病左點算？C6話「遲早都要返架啦，妳唔好咁誇張。」
6. BB對蝦同蛋敏感，99話要試下俾蛋BB食，我反對，C6話「食少少唔怕啦」。（我心入面即刻想小佢！）
7. 商量好曬邊一日同我爸媽及BB去玩，C6無端端會話「不如叫埋我阿爸阿媽！」佢唔明白其實我父母都唔多like呢對親家，仲要一齊玩，點解唔可以分開第二日玩？
8. 佢地曾經同C6講過，上黎探B時唔想有女家的人（即係我父母）係度，攪到我父母每次係佢地上黎之前就要避開。問題係，我父母係主力湊BB的，點解要咁委屈？呢個問題我同C6反映過，我覺得6299上黎咪上黎，點解我父母唔可以係度？C6話老人家係咁諗野，無辦法。
仲有太多不能盡錄。奉勸各位姊妹嫁媽寶之前諗清楚，除非妳係逆來順受個種人，否則真係無好日子過。
#退一步海闊天高
#我的極品四大長老
